Հայաստանի երրորդ նախագահ Սերժ Սարգսեանի եղբայրը՝ Ալեքսանտր Սարգսեանը Ազգային Անվտանգութեան Ծառայութեան (ԱԱԾ) կողմէ յարուցուած քրէական գործով որպէս մեղադրեալ ներգրաւուած է, այս մասին «Ազատութեան» փոխանցած է անոր պաշտպան Միհրան Պօղոսեանը:
Ըստ պաշտպանի, Սարգսեանը տակաւին անցած ամրան կը մեղադրուէր Քրէական օրէնսգիրքի 178-րդ յօդուածի յատկանիշներով՝ խարդախութեան համար: Պօղոսեանը ըսած է, որ խօսքը կը վերաբերի Մարտիրոս Սարեանի գծանկարներուն:
Ալեքսանտր Սարգսեանի խափանման միջոց ընտրուած է ստորագրութիւնը չհեռանալու մասին: Փաստաբանը առաջադրուած մեղադրանքը անհիմն որակած է:
Յուլիս 4, 2018-ին Ազգային անվտանգութեան ծառայութիւնը շուրջ 9 ժամ խուզարկած էր Երեւանի Թումանեան 11 հասցէի վրայ գտնուող Սարգսեաններու բնակարանը, որմէ ետք Ալեքսանտր Սարգսեանը բերման ենթարկուած էր: Աւելի ուշ ԱԱԾ-ը հաղորդագրութիւն տարածած էր՝ նշելով, որ Ալեքսանտր Սարգսեանը հարցաքննուած է որդիին՝ Նարեկ Սարգսեանի կողմէ Մարտիրոս Սարեանի 14 գծանկարներու յափշտակութեան մասին մեղադրանքներու առնչութեամբ:
Ազգային Անվտանգութեան Ծառայութիւնը Նարեկ Սարգսեանին պատկանող տարածքներուն եւ անոր հօր բնակարանին մէջ խուզարկութեամբ յայտնաբերած էր գումար, թմրանիւթ եւ Մարտիրոս Սարեանի նկարներ, որոնք, ըստ ԱԱԾ հաղորդագրութեան, Նարեկ Սարգսեանը ստացած է Մարտիրոս Սարեանի ժառանգներէն մէկուն վստահութիւնը չարաշահելով:
Նշենք, որ 62-ամեայ Ալեքսանտր Սարգսեանը, որ աւելի յայտնի է Սաշիկ անունով, 2003-2011 թուականներուն եղած է Ազգային ժողովի պատգամաւոր, մամուլը անոր անունը կը կապէ բազմաթիւ պիզնեսներու հետ: