Վարչապետի պաշտօնակատար Նիկոլ Փաշինեան Ամանորի եւ Սուրբ Ծննդեան տօներուն առթիւ Ամենայն Հայոց Կաթողիկոս Գարեգին Երկրորդի եւ Զինուած Ուժերու գլխաւոր շտապի պետ Արտակ Դաւթեանի հետ այցելած է պետական սահմանի պահպանութեան տեղամաս ու մարտական դիրք։
Նիկոլ Փաշինեան խրախուսած է ծառայութեան ընթացքին անձնուիրութեամբ եւ խիզախութեամբ աչքի ինկած խումբ մը սպաներու եւ զինուորներու` յանձնելով նուէրներ։ Ապա, տօնական սեղանի շուրջ ճաշած է զինուորներու հետ:
Ես ուզում եմ մի բան ասել, որպէսզի յստակ լինի մեզնից իւրաքանչիւրի համար. Հայաստանի Հանրապետութեան կառավարութեան խնդիրը եւ նպատակը շատ պարզ է՝ քաղաքական գործունէութեան ընթացքում որպէս կառավարութիւն առաւելագոյնը պաշտպանել մեր ազատամարտիկների եւ Զինուած Ուժերի ձեռքբերումները, որովհետեւ մենք չենք կարող այդ ձեռքբերումներին վերաբերուել որպէս սովորական բանի, որպէս սովորական իրադրութեան: Մենք այդ ձեռքբերումներին վերաբերւում ենք որպէս մեր ժողովրդի պատմական հնարաւորութիւն, որը մեր ամենօրեայ կեանքում իւրաքանչիւրս մեր դիրքում պարտաւոր ենք պաշտպանել, պահպանել եւ դրա համար անել առաւելագոյնը, որպէսզի մեր նահատակների առաջ կարողանանք կանգնել պարզ ճակատով եւ չամաչել: Բայց մենք նաեւ պէտք է հասկանանք, որ դա սովորական խնդիր չէ եւ այդ խնդրի լուծումը մեզնից իւրաքանչիւրից պահանջում է առանձնայատուկ ջանք, առանձնայատուկ պատասխանատուութիւն: Նաեւ մեր այսօրուայ շրջայցը ցոյց է տալիս, որ մեր երկրում, Զինուած Ուժերում այդ պատասխանատուութիւնը կայ եւ մեր խնդիրն է այդ պատասխանատուութեան բարձր զգացումը հնարաւորինս ինստիտուցիոնալ տարածման արժանացնել:
Տեսէք, մենք գործ ունենք մի դիրքի հետ, որի կառուցման գործում մեր հայրենակից բարերարն իր ներդրումն է ունեցել, զինուորական ղեկավարութիւնը՝ իր, քաղաքական ղեկավարութիւնը՝ իր եւ մենք այս համագործակցութեամբ ստացել ենք իրավիճակի որոշակի բարելաւում:
Վերջերս ունեցել ենք Անվտանգութեան խորհրդի նիստ, որը տեւել է մի ամբողջ օր: Նիստում կայացուել են շատ կարեւոր որոշումներ, որոնց մէջ առանցքային նշանակութիւն է ունեցել այն, որ մենք պէտք է առանձնայատուկ ուշադրութիւն դարձնենք մեր զինուորականների սոցիալական պաշտպանուածութեան մակարդակի վրայ: Մենք պէտք է առանձնայատուկ ուշադրութիւն դարձնենք մեր զինուորների ծառայութեան պայմանների վրայ, ընդ որում, մենք խօսում ենք ոչ միայն գործող սպաների, այլեւ զինուորական թոշակի անցած անձանց մասին:
Ի հարկէ, բանակի հզօրութեան մեծագոյն գործօնը հզօր եւ ամուր թիկունքն է, հզօր եւ ամուր հանրութիւնը, որն առաջին հերթին հաւատում է ինքն իրեն, հաւատում է իր Զինուած Ուժերին, կառավարութեանը եւ ի վերջոյ հաւատում է Աստծուն, ինչը պակաս կարեւոր չէ, քանի որ նոյնիսկ ամենամեծ նիւթական ապահովուածութեան պայմաններում առանց հաւատի հնարաւոր չէ որեւէ յաջողութեան, նուաճման հասնել:
Առաջարկում եմ բաժակ բարձրացնել այս ամբողջութեան համար, այն բանի համար, որ մեզնից իւրաքանչիւրն իր դիրքում իր ծառայութիւնը կատարի: Ի վերջոյ, սա մարտական դիրք է, բայց շատ կարեւոր է, որ բոլորս հարցերին մօտենանք այնպէս, որ նոյնպիսի մարտական դիրք է վարչապետի աշխատասենեակը, մարզպետի աշխատասենեակը, համայնքի ղեկավարի աշխատասենեակը, նոյնպիսի մարտական դիրք է այն դասասենեակը, որտեղ մտնում է ուսուցիչը:
Մեր խնդիրն է, որպէսզի մեզնից իւրաքանչիւրն իր մարտական դիրքում պատրաստ լինի նոյնպիսի զոհողութիւնների, ինչպէս մեր զինուորը, որն աչալուրջ կանգնած է շոգին, ցրտին, կենցաղային այսպիսի պայմաններում: Եթէ մեզնից իւրաքանչիւրն իր ծառայութեանն այսպիսի ընկալում եւ մօտեցում ցուցաբերի՝ համոզուած եմ՝ հէնց այդ հանգամանքի բերումով հարիւրաւոր հարցեր կը լուծուեն: Ես խմում եմ մեր բոլոր մարտական դիրքերի կենացը, ես խմում եմ նրա համար, որ իւրաքանչիւրս մեր մարտական դիրքում լինենք այնպիսին, որպէսզի արժանի լինենք մեր նահատակներին, զինուորներին, մեր անցեալին եւ սերունդներին»,- խօսքը ուղղելով զինուորներուն ըսած է Նիկոլ Փաշինեանը։