Ատրպէյճանի արտաքին քաղաքականութեան առաջնային խնդիրը կը շարունակէ մնալ «գրաւեալ տարածքներու ազատագրումը», յայտարարած է երկրի Արտաքին գործոց նախարարութիւնը՝ ամփոփելով անցնող տարուան արդիւնքները:
«Մեր դիւանագիտութեան կարեւորագոյն խնդիրն է ազատել մեր տարածքները գրաւումէն եւ բռնի տեղահանուածները վերադարձնել իրենց բնակավայրերը», – յայտարարած է Ատրպէյճանի արտաքին քաղաքական գերատեսչութիւնը:
«Մինսքի խումբի համանախագահներու, Ատրպէյճանի եւ Հայաստանի արտաքին գործոց նախարարներու՝ այս ամիս ընդունած համատեղ յայտարարութիւնը կը փաստէր, որ անհրաժեշտ է մօտ ապագային լուրջ բանակցութիւններ իրականացնել Հայաստանի եւ Ատրպէյճանի առաջնորդներու միջեւ, որոնք ուղղուած ըլլան հակամարտութեան արդար ու տեւական կարգաւորման», – ընդգծած է Ատրպէյճանի արտաքին քաղաքական գերատեսչութիւնը:
Յայտարարութեան մէջ նաեւ նշուած է, որ յաջորդ տարի Պաքուն մտադիր է շարունակել անկախ, ճկուն, գործնական ու բազմաբեւեռ արտաքին քաղաքական ընթացքը՝ միջազգային հարթակներու վրայ Ատրպէյճանի շահերը երաշխաւորելու եւ պաշտպանելու համար:
