ԱՄՆ-ի պետական քարտուղարութիւնը հաւանութիւն տուած է «Patriot» տեսակի հրթիռային համակարգերը Թուրքիոյ վաճառելու գործարքին, որու արժէքը 3,5 միլիառ տոլար կը կազմէ: Անգարան ԱՄՆ-ին դիմած էր »Patriot» տեսակի 4 համակարգ գնելու համար՝ ներառեալ երկու տասնեակ արձակման կայաններով եւ 80 հրթիռներով:
Սակայն 2017 թուականին Անգարան Ռուսաստանի հետ համաձայնագիր ստորագրած էր ռուսական «S-400» հրթիռային համակարգեր գնելու համար: Միացեալ Նահանգները եւ ՆԱԹՕ-ն բազմիցս զգուշացուցած են Անգարային, որ ռուսական հրթիռները չեն կրնար տեղ ունենալ ՆԱԹՕ-ի տարածքի հակաօդային պաշտպանութեան համակարգին մէջ:
Անցած նոյեմբերին Թուրքիոյ արտաքին գործոց նախարար Մեւլութ Չաւուշօղլուն ըսած է, թէ ռուսական հրթիռները գնելու համաձայնագիրը պիտի մնայ ուժի մէջ: Քրեմլի մամուլի խօսնակ Տմիթրի Փեսքովը ըսած է, որ «S-400» հրթիռային համակարգերը Թուրքիոյ վաճառելու գործարքը պիտի իրականացուի անկախ այն բանէն, թէ Անգարան ինչ որոշում պիտի ընդունի «Patriot»-ի հետ կապուած:
Կ’ակնկալուի, որ ռուսական «S-400»-ի առաջին խմբաքանակը Թուրքիան պիտի ստանայ 2019 թուականին:
