Ռուսաստանի արտաքին գործոց նախարարութիւնը յայտարարած է, թէ Մոսկուան եւ Երեւանը երկկողմ յարաբերութիւններու զարգացման շատ լաւ ներուժ ունին:
«Մենք հսկայական ներուժ ունինք, կան բոլոր հնարաւորութիւնները՝ զարգացնելու եւ պահպանելու այն աշխուժութիւնը, որու հիմքը դրուած է անցեալին: Մենք երկկողմ յարաբերութիւններու դրական արտակարգ շարժ ունեցած ենք, որոնք կառուցուած են տարիներով, իր նպաստը բերելով երկու երկիրներու ժողովուրդներուն: Կը կարծեմ՝ Հայաստանի մէջ գիտեն, թէ Ռուսաստանը որքան ներդրած է երկկողմ յարաբերութիւններու զարգացման գործին մէջ, թէ՛ քաղաքական կամք, թէ՛ նիւթական միջոցներ։ Եւ ես կը կրկնեմ՝ մենք միշտ շահագրգռուած ենք, որ մեր հարեւանները, մեր բարեկամ ժողովուրդները բարգաւաճեն: Այն առաջին հերթին մեր շահերէն կը բխի»,-ըսած է Զախարովան՝ ընդգծելով, որ այդ դրական աշխուժութիւնը պէտք է պահպանել, եւ նաեւ համագործակցութեան նոր ուղիներ գտնել: