Home ԳԼԽԱՒՈՐ ԼՈՒՐԵՐ Ընտրութիւններուն Պարտուող Ուժերու Յայտարարութիւնները

Ընտրութիւններուն Պարտուող Ուժերու Յայտարարութիւնները

by MassisPost

Հանրապետական կուսակցութեան ընտրական շտապի յայտարարութեան մէջ մասնաւորապէս ըսուած է. – «Աւարտուեցին ՀՀ Ազգային ժողովի արտահերթ ընտրութիւնները, որոնց արդիւնքներով պէտք է կազմաւորուի 7-րդ գումարման խորհրդարանը։ Այս ընտրութիւնները ժողովրդավարական էին իրենց ձեւով, բայց ոչ բովանդակութեամբ։ Դրանք անցան այլախոհութեան նկատմամբ անհանդուրժողականութեան, թեկնածուների եւ նրանց աջակիցների, ՏԻՄ ղեկավարների նկատմամբ բիրտ ճնշումների եւ այլատեացութեան քարոզի պայմաններում, վարչական ռեսուրսի (միջոցի) աննախադէպ կիրառմամբ: Կառավարման խորհրդարանական համակարգի անցման հիմնական նպատակներից մէկը հենց տարբեր, անգամ հակադիր կարծիքների համադրման հնարաւորութեան ստեղծումն է։ Հետեւաբար, ցաւալի է, որ ընտրարշաւն այդքան խորը բաժանարար գծեր ստեղծեց»:

ՀՀԿ-ի շտապը յաջողութիւն մաղթած է խորհրդարան անցած ուժերուն եւ անոնց ձեւաւորելիք կառավարութեան՝ նշելով, որ անկէ կախուած է երկրի եւ ժողովուրդի անվտանգութիւնն ու զարգացման հեռանկարը:

«Ընտրապայքարի ընթացքում մեր հնչեցրած մտահոգութիւնները չէին կրում քարոզչական բնոյթ, այլ արտայայտում էին մեր խորին անհամաձայնութիւնն արտաքին, անվտանգային եւ պաշտպանական քաղաքականութեան, սոցիալ-տնտեսական միտումների, ազգային արժէքների խաթարման եւ, ամենակարեւորը, Արցախի հիմնախնդրի կարգաւորման վերաբերեալ հնչեցուած մօտեցումների եւ առաջին տեսանելի քայլերի առումով: Մենք շարունակելու ենք մեր աշխատանքն այս ուղղութիւններով որպէս արտախորհրդարանական ուժ», – ըսուած է յայտարարութեան մէջ:

«Արտահերթ խորհրդարանական ընտրութիւնների արդիւնքում ՀՅ Դաշնակցութիւնը ներկայացուած չի լինի Հայաստանի Հանրապետութեան 7-րդ գումարման Ազգային ժողովում: Սա պարտութիւն է, սակայն ոչ մեր ընտրողների», – յայտարարած է ՀՅԴ-ն:

Իր հրապարակած յայտարարութեան մէջ Դաշնակցութիւնը նշած է, որ այդ պարտութեան մէջ կը տեսնէ հետեւեալը. – «Ընտրողն այսօր իր ձայնը տուեց անհատին, ոչ գաղափարին ու ծրագրին: Ընտրութեան մասնակիցների մի ստուար զանգուածն այսօր կեդրոնացած է «ներքին թշնամու» կերպարի վրայ ու ապշելու աստիճան անհոգ է արտաքին եւ ներքին վտանգներին յանդիման: Դաշնակցութեան մօտեցումներն այսօր ընկալուում են փոքրամասնութեան կողմից: Պատշաճօրէն չի կարեւորուում Արցախեան գործօնը քաղաքական օրակարգում: Ձեւաւորուում է Ազգային ժողով առանց յստակ գաղափարական եւ ազգային դիմագծի»:

«Սասնայ Ծռեր» համահայկական կուսակցութեան Քարտուղարութեան տարածած յայտարարութեան մէջ  ըսուած է. « ՀՀ Ազգային ժողովի 2018 թ. դեկտեմբերի 9-ի արտահերթ ընտրութիւնները էական առաջընթաց քայլ էին նախկին յանցաւոր ռեժիմին հեռացնելուց յետոյ Հայաստանում ժողովրդավարութեան հաստատման եւ ազգային պետականութեան կայացման ճանապարհին:

Քուէարկութիւնը, չնայած դրա ընթացքում արձանագրուած խախտումներին, ընդհանուր առմամբ եղել է ազատ ու թափանցիկ, ինչի շնորհիւ ժողովուրդն ազատօրէն արտայայտել է իր կամքը:

Այդուհանդերձ՝ անհրաժեշտ է նշել, որ ընտրութիւնների արդիւնքների վրայ շօշափելի ազդեցութիւն ունեցան մի շարք գործօններ, որոնք պայմանաւորուած էին Ընտրական օրէնսգիրքը եւ Կուսակցութիւնների մասին օրէնքը չփոփոխելու հանգամանքով: Դրա հետեւանքով ընտրութիւններին մասնակցող ուժերի միջեւ առաջացաւ անհաւասար մրցակցութիւն եւ, օլիկարխիան, օգտուելով ընձեռնուած հնարաւորութիւնից, մասնակցեց ընտրութիւններին եւ մասամբ նորից սողոսկեց խորհրդարան:

Այդ պատճառով ստիպուած ենք փաստել, որ ընտրութիւնները չեն կարող անվերապահ կերպով համարուել արդար:

Անկախ այս հանգամանքից, կարեւորելով ժողովրդի ազատ կամաարտայայտութեան փաստը, «Սասնայ Ծռեր» համահայկական կուսակցութեան Քարտուղարութիւնը ճանաչում է ընտրութիւնների արդիւնքները, շնորհաւորում է «Իմ Քայլը» դաշինքին՝ նրա տարած յաղթանակի առթիւ եւ ապագայ կառավարութեանը մաղթում է արգասաբեր աշխատանք»:

Հարակից Նյութեր

Leave a Comment