Ռուսաստանի Դաշնութեան նախագահի մամլոյ խօսնակ Տմիթրի Պեսկովը յայտարարած է, որ Հաւաքական անվտանգութեան պայմանագրի կազմակերպութեան գլխաւոր քարտուղարի հարցը չէ լուծուած:
Տմիթրի Պեսկովը այդ մասին ըսած է լրագրողներու հետ զրոյցի ժամանակ՝ անդրադառնալով այն հարցին, թէ՝ լուծուա՞ծ է ՀԱՊԿ գլխաւոր քարտուղարի նշանակման հարցը:
«Ոչ, հարցը չէ լուծուած: Բնականաբար, ԵԱՏՄ անդամ երկիրներու ղեկավարներու զրոյցի ընթացքին օրակարգէն դուրս այդ հարցի քննարկումը նախաձեռնած է Ալեքսանտր Լուքաշենկոն: Սա նորմալ ձեւաչափ է, իւրաքանչիւր երկրի ղեկավար ազատ է բարձրացնել այն հարցերը, որոնք անհրաժեշտ կը համարէ»,- ըսած է Պեսկովը:
Քրեմլինի խօսնակը մասնաւորապէս նշած է, որ Պելառուսի նախագահը վիճայարոյց այդ հարցին անդրադարձած ժամանակ, ՀԱՊԿ անդամ երկիրներու բոլոր առաջնորդները չեն եղած բանակցային սեղանին շուրջ: «Վերջիններիս [բացականերու] հետ քննարկումները շարունակած են աւելի ուշ՝ ԱՊՀ գագաթնաժողովի ընթացքին», -ըսած է Պեսկով՝ ընդգծելով, որ վերջնական համաձայնութիւն ձեռք չէ բերուած:
«Աշխատանքները պիտի շարունակուին»,- ընդգծած է Ռուսաստանի Դաշնութեան նախագահի մամլոյ խօսնակը:
Յիշեցնենք, որ Եւրասիական տնտեսական բարձրագոյն խորհուրդի նիստէն ետք լրագրողներու հետ զրոյցի ժամանակ Պելառուսի նախագահ Ալեքսանտր Լուքաշենկոն յայտարարած էր, որ ՀԱՊԿ գլխաւոր քարտուղարի հարցը լուծուած է, եւ այդ պաշտօնին պիտի նշանակուի Պելառուսի ներկայացուցիչը: Պելառուսի նախագահի յայտարարութիւնը հերքած էր ՀՀ վարչապետի մամլոյ խօսնակ Արման Եղոյեանը՝ նշելով, որ ՀԱՊԿ գլխաւոր քարտուղարի հարցը չէ լուծուած:
