«Հայաստանում յառաջիկայ հինգ տարիների ընթացքում արմատախիլ ենք անելու ծայրայեղ աղքատութիւնը, նուազեցնելու ենք գործազրկութիւնը», – Սպիտակի մէջ՝ քարոզարշաւի ժամանակ, յայտարարած է վարչապետի պաշտօնակատար, «Իմ քայլը» դաշինքի ընտրական ցուցակը գլխաւորող Նիկոլ Փաշինեան՝ ընդգծելով, որ իրենք աղքատութեան յաղթահարումը չեն պատկերացներ մարդոց բրինձ, մուրապա (անուշ), կամ փող բաժնելով:
«Էդ փողը ծախսեց, պրծաւ, էդ մարդը յետոյ ի՞նչ է անելու: Մենք դա տեսնում ենք աշխատանքի միջոցով, ներդրումների միջոցով, նոր աշխատատեղերի միջոցով, գործարանների միջոցով», – ըսած է Փաշինեան՝ շարունակելով. – «Էսօր Հայաստանի Հանրապետութիւնում մօտաւորապէս 500 միլիոն տոլարի եւ աւելի ներդրումային ծրագրեր են քննարկւում կառավարութեան հետ, եւ այդ ծրագրերի թիւը մեծանելու է: Հայաստանում բացուելու են հազարաւոր աշխատատեղեր, բայց էդ աշխատատեղերի մի մասը նաեւ դուք էք բացելու, որովհետեւ մենք ուզում ենք ձեզ քաջալերել, որ դուք զբաղուէք ձեռներեցութեամբ: Մենք գիւղացուն պէտք է ապահովենք ոռոգման ջուր, մենք գիւղացուն պէտք է ապահովենք հակակարկտային համակարգով, մենք գիւղացուն պէտք է հնարաւորինս մատչելի վարկային միջոցներով ապահովենք եւ քաջալերենք, ապահովենք նրանց մթերքի սպառումը, արտահանումը Հայաստանի Հանրապետութիւնից: Մենք մարդկանց պէտք է օգնենք վաստակել, որովհետեւ Հայաստանի քաղաքացին իր բարեկեցութիւնը պէտք է ապահովի արժանապատիւ աշխատանքով»:
Փաշինեան ընդգծած է՝ անձամբ պիտի երթայ այն գիւղապետերու ետեւէն, որոնք կը փորձեն վախցնել գիւղացիները:
«Որտե՞ղ կայ դեռ հանրապետական գիւղապետ, որի մտքով անցնում է իր գիւղացիներին ընտրութեան, կամ այլ առիթով վախեցնել, ուրեմն, էդ գիւղապետեր, իմացէ՛ք՝ անձամբ ես գալու եմ ձեր յետեւից ու վզներիցդ բռնած դուրս եմ շպրտելու ձեր քապինեթներից: Էս երկրում մարդ կա՞յ, որը համարձակւում է քաղաքացուն վախեցնել, տո, այո՛, բոլորիդ կը պառկացնենք ասֆալթներին: Էս ովքե՞ր են սրանք, ի՞նչ հանրապետական, ի՞նչ օլիկարխ, ի՞նչ հաստավիզ, ի՞նչ մուսքուլաւոր, բոլորիդ կը պառկացնենք էդ ասֆալթներին ու տարիներով վեր չէք կենայ էդ ասֆալթների վրայից», – ըսած է վարչապետի պաշտօնակատարը: