Նախկին վարչապետ Յովիկ Աբրահամեանի ընտանիքին պատկանող ջերմոցները շուրջ 15 տարի ոռոգուած են ապօրինի տեղադրուած խողովակներով։ Այս մասին կատարուած ուսումնասիրութիւններէն ետք յայտարարութիւն տարածած է Պետական վերահսկողութեան ծառայութիւնը։
Յայտնաբերուած խողովակաշարերով, նախնական հաշուարկով, աւելի քան 15 տարի ջուր հոսած է խաղողի այգիները ոռոգելու նպատակով, սակայն անկէ մէկ մասին համար առկայ են չնչին վճարումներ։
Խախտումը արձանագրուած է տեղւոյն վրայ, տարածքի մէջ ներկայ եղած են Ջրային կոմիտէի «Ջրառ» ՓԲԸ տնօրէնը, տեղակալը, գլխաւոր ճարտարագէտը, «Արտաշատ ՋՕԸ»-ի եւ Արտաշատի մարզպետարանի ներկայացուցիչներ եւ ոստիկանութեան մարզային բաժնի աշխատակիցներ:
«Արտաշատ Ուինքոմ» ՍՊԸ-ն եւ ջերմոցները կը պատկանին նախկին վարչապետ Յովիկ Աբրահամեանի ընտանիքին։
Դէպքի առիթով ՀՀ Ոստիկանութեան Արարատի մարզի Արտաշատի բաժնէն ներս կը նախապատրաստուին նիւթեր: