Նոյնիսկ ամենաբռնապետական իշխանութիւնը չի կրնար Ղարաբաղի հարցը լուծել առանց ժողովուրդի կարծիքը հաշուի առնելու: Այս մասին յայտարարած է վարչապետի պաշտօնակատար Նիկոլ Փաշինեանը չորեքշաբթի օր Ազգային ժողովին մէջ իր ելոյթի ժամանակ:
«Ժողովրդի կարծիքն է էն վճռական գործօնը, որը պէտք է որոշի՝ Ղարաբաղի հարցի լուծման այս կամ այն տարբերակը մեզ ձեռնտու է, թէ ձեռնտու չէ: Ղարաբաղի հարցի թաքուն լուծում, թաքուն տարբերակ, որ մէկ էլ մի օր, հոպ, արթնանանք տեսնանք Ղարաբաղի հարցը լուծուել է եւ տենց մնացել ենք մենք կամ հանրութիւնը․․․ էդպիսի բան չի կարող լինել ուղղակի», – ըսած է Փաշինեանը:
Վարչապետի պաշտօնակատարը վստահեցուցած է՝ եթէ ըլլայ ղարաբաղեան հարցի լուծման այնպիսի տարբերակ, որ ինքը կը համարէ արժանի ներկայացնելու ժողովուրդի քննարկման, ապա առաջին քայլը այդ կ’ըլլայ․ – «Ես էլի եմ ասում՝ քանի դեռ Ղարաբաղի իշխանութիւնը ներգրաւուած չէ բուն գործընթացին մէջ, նշանակում է՝ մենք մօտիկ չենք հարցի կարգաւորմանը: Իմիջիայլոց, ասեմ՝ էդ կապակցութեամբ իմ խօսքերը նոյնպէս նենգափոխում են, ասում են, որ ես ասել եմ, որ մինչեւ Ղարաբաղի իշխանութիւնը չլինի բանակցային սեղանի շուրջ, ես ոչ մի բանակցութեան չեմ մասնակցի: Ես էդպիսի բան չեմ ասել, ես ասել եմ, որ ես լիազօրուած եմ բանակցել Հայաստանի Հանրապետութեան անունից, ես լիազօրուած չեմ մասնակցել Լեռնային Ղարաբաղի եւ նրա ժողովրդի անունից»:
Փաշինեանը ընդգծած է, որ առանց Ղարաբաղի կարգավիճակի ճշգրտման չի պատկերացներ հարցի կարգաւորում, շարունակելով․ – «Ենթադրենք, ես ասեմ, այո, ես առանց Ղարաբաղի կարգավիճակի ճշգրտման պատկերացնում եմ ղարաբաղեան հարցի լուծում, հա, յայտարարեցի, դրանից իրականութիւն փոխուո՞ւմ է՝ չի փոխուում իրականութիւն»: