«Միացեալ Նահանգները պիտի աջակցի ժողովրդավար Հայաստանին եւ հայաստանեան խորհրդարանական ընտրութիւններէն ետք Ուաշինկթընն ու Երեւանը պիտի քննարկեն յարաբերութիւններու խորացման հարցը», – Երեւանի մէջ լրագրողներու հետ հանդիպման ժամանակ յայտարարած է այցով Հայաստան գտնուող ԱՄՆ պետական փոխքարտուղարի տեղակալ Ճորճ Քենթը:
«Հայաստանի խորհրդարանական ընտրութիւններէն ետք, հաւանաբար գալիք տարուան փետրուարին Ուաշինկթընի մէջ մենք պիտի գումարենք ամերիկա-հայկական միջկառավարական աշխատանքային խումբի հերթական նիստը՝ իրականացնելու համար ռազմավարական նշանակութեան քննարկումներ: Կը կարծեմ, մեզի համար այդ գերազանց պահ պիտի ըլլայ՝ քննարկելու, թէ ինչպէս կրնանք խորացնել մեր յարաբերութիւնները: Ինչպէս դեսպան Միլզը յայտարարեց անցած շաբաթ, ի պատասխան այստեղ տեղի ունեցած փոփոխութիւններուն, որոնք դուք կ’անուանէք «թաւշեայ յեղափոխութիւն», ԱՄՆ-ն մեծցուց Հայաստանին յատկացուող աջակցութիւնը՝ օժանդակելու այն փոփոխութիւններուն, որ հայաստանցիները առաջ կը տանին», – նշած է ամերիկացի բարձրաստիճան դիւանագէտը:
Ճորճ Քենթ կը զբաղցնէ Եւրոպայի եւ Եւրասիայի հարցերով ԱՄՆ պետական փոխքարտուղարի տեղակալի պաշտօնը եւ պատասխանատու է Ուքրանիոյ, Մոլտովայի, Պելառուսի, Հայաստանի, Վրաստանի ու Ատրպէյճանի հետ յարաբերութիւններու համակարգման համար:
Վարչապետ Նիկոլ Փաշինեանը ընդունած էր Քենթը եւ կառավարութեան լրատուական ծառայութեան փոխանցմամբ, ամերիկացի դիւանագէտը ըսած էր, որ ուրախ է այցելել Հայաստան երկրի մէջ տեղի ունեցող փոփոխութիւններու ժամանակաշրջանին, եւ Միացեալ Նահանգները կը կարեւորէ Հայաստանի հետ փոխշահաւէտ գործակցութեան յետագայ ընդլայնումը․ – «Միացեալ Նահանգները կ’աջակցի ժողովրդավար, անվտանգ եւ բարգաւաճ Հայաստանին: Տեղեակ ենք, որ ձեր երկիրը ժողովրդավար կերպով փոխուեցաւ, հնարաւոր են նոր ընտրութիւններ, եւ մենք կը քաջալերենք, որպէսզի այդ ընտրութիւնները ըլլան ազատ եւ արդար, որոնց պիտի մասնակցին բոլորը»:
Անդրադառնալով Հայաստանի վարչապետի ու Միացեալ Նահանգներու նախագահի հնարաւոր հանդիպման հարցին՝ Ճորճ Քենթը վստահութիւն յայտնած է, որ այն պիտի կայանայ․ – «Որպէս դիւանագէտներ մենք միշտ կ’աջակցինք մեր առաջնորդներու միջեւ հանդիպման կայանալուն: Վստահ եմ, որ Թրամբ-Փաշինեան հանդիպումը պիտի կայանայ, սակայն չեմ կրնար ըսել, թէ այն երբ ու ուր պիտի կայանայ»: