«Իթիհատ եւ Թարաքի, հիմնադիրներ, գաղափարախօսութիւն եւ կառոյց» խորագրի տակ, Քալիֆորնիոյ Նահանգային համալսարանի (Ֆրեզնօ) Հայագիտական հիմնարկի նախաձեռնութեամբ տեղի պիտի ունենայ երկօրեայ միջազգային գիտաժողով Ուրբաթ, 12 Հոկտեմբեր եւ Շաբաթ, 13 Հոկտեմբեր 2018-ին, համալսարանի Business Center-ին մէջ (5245 N. Backer Ave., A. Peters Auditorium, Room 191, Fresno State campus):
Սոյն գիտաժողովը պիտի կեդրոնանայ Իթիհատ եւ Թարաքի (Երիտթուրքերու) կուսակցութեան գործունէութեան վրայ: Անոնք կը հանդիսանային Օսմանեան Թուրքիոյ քաղաքական առաջնորդները 1908-էն մինչեւ 1915 թուականը եւ անոնց որոշումներու եւ գաղափարախօսութեան խիստ հետեւանքները ներկայ էին հայոց Ցեղասպանութեան եւ համաշխարհային Ա. պատերազմի ընթացքին:
Գիտաժողովի մասնակիցները պիտի քննարկեն զանազան հարցեր՝ Իթիհատ եւ Թարաքի կոմիտէութեան եւ հայերու փոխ-յարաբերութեան մասին:
Գիտաժողովի հովանաւորներն են՝ Թոմաս Ա. Գույումճեան Հիմնարկը, Լեւոն Ս. Փիթըրզ հիմնարկը եւ Մ. Վիքթորիա Գազան հայագիտական հիմնադրամը:
Հայագիտական ամպիոնի հիմնադիր՝ Փրոֆ. Պարլօ Տէր Մկրտիչեան պիտի կատարէ սոյն գիտաժողովի բացումը, Ուրբաթ առաւօտ ժամը 10:00-ին: Ապա, Ֆրանսայէն Տօքթ. Րէյմոնտ Գէորգեան պիտի խօսի, Երիտ. Թուրքերու իշխանութեան եւ գաղափարախօսութեան մասին:
Գիտաժողովի առաջին բաժինը ունի երկու դասախօսներ.- Hans-Lukas Kieser (University of Sydney, Australia) նիւթ՝ “ Talaat Pasha and Ziya Gkalp” եւ Dugu Coskuntuna (Princeton University), նիւթ՝ Homeland and Nation Revisited:
Գիտաժողովը պիտի շարունակուի Շաբաթ օր, 13 Հոկտեմբեր առաւօտ. ժամը 10:00-ին:
Յաւելեալ տեղեկութեանց համար, դիմել (559) 278-2669 թիւին կամ այցելել www.fresnostate.edu/armenianstudies կայքէջը:
