Եգիպտոսի մայրաքաղաք Գահիրէի մէջ աւարտին կը մօտենան հայկական գերեզմանոցի վերականգնման աշխատանքները: Այս մասին գրած է Reuters գործակալութիւնը «Վերականգնուած գերեզմանոցը ցոյց կու տայ Գահիրէի մէջ հայերու պատմութիւնը» խորագիրով յօդուածի մը մէջ:
Գերեզմանոցը կ՛արտացոլէ Գահիրէի մէջ հայկական համայնքին պատմութիւնը: Աշխատողները արդէն ամրացուցած են եւ մաքրած են գերեզմանաքարերը, տեղադրուած կիսանդրիները:
«Կար ժամանակաշրջան մը, երբ այս վայրը անտէրութեան մատնուած էր, եւ անիկա վերանորոգելու ծրագիրը հոյակապ նախաձեռնութիւն էր»,- նշած է աշխատանքները համակարգող հնաբան Նայիրի Համբիկեան: Ան յայտնած է, որ յայտնաբերուած են գերեզմանաքարեր, որոնք կը թուագրուին մինչեւ 1830-ական թուականները:
Վերանորոգման աշխատանքները մեկնարկած էին դեռ 2014-ին, անոնք աւարտին պիտի հասնին 2018-ի վերջը: Անիկա հնարաւոր դարձած է հայկական եկեղեցւոյ ու համայնքի նիւթական աջակցութեան շնորհիւ:
«Reuters» գրած է, որ հայերը Եգիպտոսի մէջ սկսած են հաստատուիլ 10-12-րդ դարերուն, իսկ 1844 թուականին Մուհամմէտ Ալի Փաշան հայերուն յանձնած էր առանձին հողակտոր, որ ներկայիս յայտնի է իբրեւ հին իսլամական Գահիրէ:
«Հայերու քանակը Եգիպտոսի մէջ կը տատանուէր՝ կապուած երկրի քաղաքական ու տնտեսական իրադրութեան հետ: Սակայն, Առաջին աշխարհամարտի դէպքերէն ետք, երբ օսմանեան ուժերը 1915-ին սպաննեցին աւելի քան 1.5 միլիոն հայեր, մեծ թիւով հայեր գաղթեցին Եգիպտոս եւ միւս երկիրներ»,- գրած է լրատուամիջոցը՝ ընդգծելով, որ հայերը հաստատուեցան համաշխարհային քաղաքներու մէջ, ինչպէս՝ Գահիրէ եւ Ալեքսանդրիա, ուր կը բնակին նաեւ իտալական ու յունական համայնքները:
