2018 թուականի առաջին կիսամեակին Հայաստան այցելած է 685 հազար 970 զբօսաշրջիկ, ինչը նախորդ տարուան նոյն ժամանակահատուածին համեմատ աճած է 10.2 տոկոսով: Այս մասին ամփոփելով պաշտօնավարման 100 օրն՝ ըսած է ՀՀ տնտեսական զարգացման եւ ներդրումներու նախարար Արծուիկ Մինասեանը:
Նախարարը յայտնած է, որ զբօսաշրջութեան նպատակով հանրապետութենէն մեկնած է 610 հազար 900 մարդ՝ նախորդ տարուան համեմատ աճելով 7.1 տոկոս:
«Ժամանած ու մեկնած զբօսաշրջիկների տարբերութիւնը կազմել է շուրջ 75 հազար մարդ: Նախորդ տարի այս ցուցանիշը 52 հազար էր»,- նշած է ան:
Արծուիկ Մինասեանի խօսքով՝ զբօսաշրջիկներու շուրջ 27.1 տոկոսը եղած է Անկախ Պետութիւններու Համագործակցութիւն (ԱՊՀ) երկիրներէն, որ նախորդ տարուան համեմատ աճած է 17.4 տոկոսով:
Զբօսաշրջիկներու 24 տոկոսը Հայաստան այցելած է Եւրոպական Միութեան անդամ երկիրներէն. այստեղ աճը կազմած է 43.3 տոկոս: «Հայաստան այցելած զբօսաշրջիկների 48.9 տոկոսը բաժին է ընկնում այլ երկրներին: Այստեղ աճը կազմել է 8.1 տոկոս»,- ըսած է տնտեսական զարգացման եւ ներդրումներու նախարարը:
Նշուած է նաեւ, որ զբօսաշրջիկներու 52,5 տոկոսը Հայաստան եկած է հանգիստի եւ ժամանցի նպատակով, 22,9 տոկոսը՝ գործնական նպատակով, 1,5 տոկոսը՝ բուժման նպատակով:
Ինչ կը վերաբերի ներքին զբօսաշրջութեան, ապա այստեղ արձանագրուած է 17,1 տոկոսով աճ: Ներքին զբօսաշրջութեան կառուցուածքին մէջ, ըստ Արծուիկ Մինասեանի, 69.9 տոկոսը բաժին ինկած է հանգիստին եւ ժամանցին:
