Յեղափոխութիւնը Հայաստանի մէջ ոչ միայն տնտեսական անկման չէ բերած, այլեւ յանգեցուցած է տնտեսական աշխոյժութեան: Կառավարութեան նիստի ընթացքին անդրադառնալով առաջին կիսամեակի տնտեսական աշխոյժութեան բարձր ցուցանիշին՝ այս մասին յայտարարած է վարչապետ Նիկոլ Փաշինեանը:
«Ընդունուած է կարծել, որ քաղաքական այսպիսի փոփոխութիւններից յետոյ սովորաբար տնտեսութիւնները, տնտեսական աքթիւութիւնը կտրուկ անկում է ապրում, բայց կարծում եմ՝ մեր յեղափոխութիւնը այս դէպքում էլ շատ կարեւոր առանձնայատկութիւն գրանցեց․ պաշտօնական վիճակագրութեան համաձայն, մենք յունիս ամսուայ ընթացքում ունեցել ենք 9,6 տոկոս տնտեսական աքթիւութեան ցուցանիշ, կիսամեակային տուեալով տնտեսական աքթիւութեան ցուցանիշը կազմել է 8,9 տոկոս: Այսինքն՝ յեղափոխութիւնը, քաղաքական փոփոխութիւնները, ոչ միայն տնտեսական անկման չեն բերել, չնայած սովորաբար այդպէս է լինում եւ դա նորմալ է համարուում, ընդհակառակը՝ բերել են որոշակի տնտեսական աքթիւութեան: Դա իհարկէ պայմանաւորուած է որոշ առարկայական եւ ենթակայական պատճառներով»,- ըսած է Նիկոլ Փաշինեանը:
«Մեր ամենակարեւոր դիրքորոշումը տնտեսութեան բնականոն, օրինական զարգացմանը չխանգարելն է, ընդհակառակը՝ օգնելն է»,- կառավարութեան նիստին յայտարարած է վարչապետը:
Հայաստանի մէջ տնտեսական գործունէութիւն ծաւալելու համար այլեւս կարիք չկայ որեւէ մէկուն «տապրոն» ստանալ՝ ընդգծած է վարչապետ Նիկոլ Փաշինեանը: «Մենք երաշխաւորում ենք, Հայաստանի Հանրապետութեան կառավարութիւնը երաշխաւորում է ներդրումների անվտանգութիւնը: Սա նշանակում է, որ որեւէ ներդրում որեւէ ձեւով չի կարող որեւէ վտանգի ենթարկուել: Մի պայմանով, որ դա օրինական ներդրում է, այսինքն՝ այդտեղ ապօրինի գործունէութեան որեւէ հետք չկայ: Ցանկացած ներդրում եւ ներդրող ազատ է որեւէ կոռուպցիոն պարտաւորութիւնից որեւէ մակարդակում:
Այսինքն՝ եթէ յանկարծ որեւէ այդպիսի դրսեւորում կը լինի, դա կը լինի կառավարութեան եւ իրաւապահ մարմինների պատասխանատուութիւնը, որ արագ այդ խնդիրները լուծեն եւ պատասխանատուութեան ենթարկեն բոլոր նրանց, ովքեր որեւէ ներդրողի նկատմամբ փորձում են ձեւաւորել կոռուպցիոն որեւէ պարտաւորութիւն»,- յայտարարած է վարչապետը:
«Հայ ազգային քոնկրեսի» ներկայացուցիչ, տնտեսագէտ Վահագն Խաչատրեանի խօսքով, յեղափոխութիւնն, անշուշտ, չէ լուծած հայաստանեան տնտեսութեան առջեւ ծառացած բոլոր հիմնախնդիրները, սակայն փոփոխութիւններն արդէն իսկ ակնյայտ են: «Փոփոխութիւնն այն է, որ իրականում մենաշնորհային դաշտում էական փոփոխութիւններ կան, եւ հիմա գործարարները համոզուել են, որ իսկապէս Հայաստանում պիզնեսի ցանկացած տեսակով կարելի է զբաղուել, ու ոչ ոք չի կարող ձեզ անհանգստացնել կամ արգելել:
Երկրորդը կոռուպցիայի դէմ պայքարն է, որին բոլորս ենք ականատես: Դա նոյնպէս էական ազդեցութիւն է ունեցել տնտեսական կեանքի վրայ: Բայց էստեղ մի բայց կայ, որը, համոզուած եմ՝ ընթացքում կը լուծուի․ նախկին կոռուպցիոն սխեմաները չեն աշխատում, բայց դեռեւս նոր՝ օրինական սխեմաները նոյնպէս չեն աշխատում»,- ըսած է Վահագն Խաչատրեանը:
