Ուաշինկթընի եւ Անգարայի միջեւ անցած շաբթուընէ սկսած դիւանագիտական ճգնաժամը օրէ օր կը խորանայ, ինչի արդիւնքով թրքական լիրան հերթական անկում արձանագրած է՝ հասնելով տոլարի նկատմամբ պատմութեան մէջ ամենացած ցուցանիշին: Այս ըստ էութեան, սակարաններու արձագանգն է Ուաշինկթընէն հնչող վերջին յայտարարութիւններուն, ըստ որոնց՝ թրքական ընկերութիւններն յառաջիկային կրնան կորսնցնել առանց մաքսատուրքերու ամերիկեան շուկայ մտնելու արտօնութիւնը:
Անցեալ շաբաթ, Սպիտակ տունը պատժամիջոցներ սահմանած էր երկու թուրք նախարարներու նկատմամբ՝ սառեցնելով անոնց հաշիւներն ԱՄՆ տարածքին: Փորձագէտները, սակայն, յայտնած են, որ թուրք պաշտօնեաներու դէմ պատժամիջոցներն աւելի շատ խորհրդանշական բնոյթ ունէին, մինչդեռ թրքական ապրանքները, այսպէս կոչուած՝ Duty free ռեժիմէն ազատելը կրնայ իսկապէս ցաւագին ըլլալ Անգարայի համար:
Էրտողան իր հերթին սպառնացած էր, թէ ԱՄՆ-ն կրնայ կորսնցնել Անգարայի նման վստահելի ու հաւատարիմ դաշնակից: Նախօրէին Էրտողանի վարչակազմը խօսքէն գործի անցաւ՝ պատժամիջոցներ սահմանելով ԱՄՆ-ի նկատմամբ: « Այժմ ես կը յանձնարարեմ իմ գործընկերներուս՝ սառեցնել Միացեալ Նահանգներու ներքին գործերու ու արդարադատութեան նախարարներու՝ Թուրքիոյ մէջ ունեցած հաշիւներն ու կալանք դնել անոնց ունեցած սեփականութեան վրայ»,- ըսած է Էրտողան:
Մինչ այդ, արեւմտեան լրատուամիջոցները որոշ մանրամասներ հրապարակած են Անգարայի եւ Ուաշինկթընի միջեւ այս հարցի շուրջ ամիսներ շարունակուած գաղտնի բանակցութիւններուն մասին: Bloomberg գործակալութիւնը կը պնդէ, թէ կողմերը շատ մօտ եղած են համաձայնութեան, եւ Անգարան պատրաստ եղած է ազատ արձակել Պրանսընին, պայմանաւ, որ Ուաշինկթընը թոյլ տայ թրքական պետական Halkbank -ի նախկին գործադիր տնօրէն Հաքան Աթիլլային ամերիկեան բանտէն տեղափոխել Թուրքիա եւ հայրենիքին մէջ կրել պատժի մնացած մասը: Վերջինս ամիսներ առաջ նիւեորքեան դատարանին կողմէն երկուքուկէս տարուան ազատազրկման դատապարտուած է՝ Իրանի նկատմամբ ամերիկեան պատժամիջոցները շրջանցելու համար:
Bloomberg -ի աղբիւրները նշած են, թէ Ուաշինկթընը համաձայնած է այդ պահանջին, սակայն գործարքն ի վերջոյ չէ կայացած, քանի որ Անգարան վերջին պահուն առաջ քաշած է նոր նախապայմաններ: Ըստ այդմ՝ թրքական կողմը պահանջած է, որ Ուաշինկթընը յետագային որեւէ քրէական հետապնդում պիտի չիրականացնէ Halkbank-ի նկատմամբ: «Եթէ այդ յաջողէր, Էրտողանը իրապէս յաղթող դուրս կու գար բանակցութիւններէն: Բայց անոր փոխարէն ան յայտնուեցաւ Թրամփի ցասման թիրախ»,- DW-ին ըսած է Նահանգներուն մէջ գործող վերլուծական կեդրոններէն մէկուն փորձագէտ Մերվէ Թահիրօղլուն: