Հայաստանի մէջ ԱՄՆ դեսպան Ռիչարտ Միլսը կը վստահեցնէ՝ ԱՄՆ կառավարութիւնը կը դիտարկէ, թէ ինչ միջոցներով ու ճանապարհով կրնար աջակցիլ ՀՀ կառավարութեան: Ան երէկ լրագրողներուն հետ զրոյցի ժամանակ ըսած է, որ աջակցութիւնը կրնայ ներառել ֆինանսական ծաւալներու աւելացում:
«Կը դիտարկենք հնարաւոր ուղիները, եւ այն կրնայ ներառել ֆինանսաւորման ծաւալներու աւելացում, որ աջակցութեան տեսքով կը յատկացուի Հայաստանին՝ Միջազգային զարգացման գործակալութեան եւ ԱՄՆ այլ պետական կառոյցներու կողմէն»,- ըսաւ ան:
Ըստ դեսպանին՝ այս պահուն ամերիկացի ներդրողներն իրենց ուշադրութեան կեդրոնը կը պահեն ՀՀ նոր իշխանութիւններու գործողութիւնները՝ կապուած գործարար միջավայրի խնդիրներու կարգաւորման հետ: Միլսի խօսքով՝ գործարար միջավայրն ուշադրութեան կեդրոնը կը պահէ նաեւ «Լիտիան Արմէնիա»-ի հետ կապուած գործողութիւններու ընթացքը:
«Անոնք կը հետեւին՝ ինչպիսի ընթացք կու տայ կառավարութիւնը գործարարներու խնդիրներուն, ըլլան անոնք տեղական, թէ ամերիկացի գործարարներ: Կառավարութեան գործողութիւնները անոնց դիտարկման տիրոյթէն ներսն են այժմ», – շեշտած է Ռիչարտ Միլսը:
Հայաստանի մէջ Միացեալ Նահանգներու դեսպանը վաղ կը համարէ խոշոր ներդրումներու մասին խօսիլը: Անոր գնահատմամբ՝ կաշառակերութիւնը եւ բոլոր տնտեսվարողներու համար հաւասար պայմաններու ապահովումը ներդրումներու ճանապարհին խոչընդոտ էր: Միեւնոյն ժամանակ ան ողջունած է կաշառակերութեան դէմ պայքարին մէջ ՀՀ կառավարութեան ներկայիս գործողութիւնները: