Home ԳԱՂՈՒԹԱՅԻՆ Փասատինայի Մէջ Նշուեցաւ Հնչակեան Քսան Կախաղաններու Տարելիցը

Փասատինայի Մէջ Նշուեցաւ Հնչակեան Քսան Կախաղաններու Տարելիցը

by MassisPost

Միացեալ Նահանգներու Փասատինա  քաղաքի ՍԴՀԿ «Փարամազ» մասնաճիւղի կազմակերպութեամբ, Կիրակի, Յուլիս 15-ին,  տեղի ունեցաւ Հնչակեան Քսան Կախաղաններու  103-ամեակի ոգեկոչումը:

Սբ. Գրիգոր Լուսաւորիչ եկեղեցւոյ «Կիրակոս» սրահէն ներս,  ներկայ էին Արեւմտեան Թեմի առաջնորդ՝ Յովնան Արք. Տէրտէրեան, Վաչէ Արք. Յովսէփեան, ՍԴՀԿ Կեդրոնական Վարչութեան եւ Վարիչ Մարմինի անդամներ, ՌԱԿ-ի Շրջանային Վարչութեան ատենապետն ու անդամներ, ՀԲԸՄ-ի ներկայացուցիչներ, Պոլսահայ Միութեան ղեկավար անդամներ, մամուլի ներկայացուցիչներ եւ մեծ թիւով հանդիսականներ:

Երեկոն սկսաւ Միացեալ Նահանգներու, Հայաստանի Հանրապետութեան եւ ՍԴՀԿ քայլերգներով: Բացման ոգեւորիչ ելոյթով հանդէս եկաւ օրուայ հանդիսավարուհի  Տիկ. Թագուհի Արզումանեան: Բացման  խօսքով ուղղեց «Փարամազ» մասնաճիւղի ատենապետ Ընկ. Տիրան ճէրէճեան եւ երիտասարդութեան խօսքը Անգլերէն լեզուով արտասանեց իրաւաբան Վահան Խոտանեան:

Օրուայ գլխաւոր բանախօսն էր ՍԴՀԿ Կեդրոնական Վարչութեան անդամ, Գանատայէն հրաւիրուած Ընկ. Կիրակոս Թիւթիւնճեան: Ան իր համապարփակ ելոյթին մէջ գնահատականը կատարեց Քսաններու գործունէութեան ու հետապնդած նպատակներուն, որոնք կարճ տարիներ  ետք իրականութիւն դարձան Սարդարապատի ճակատամարտով ծնունդ առած Հայաստանի Հանրապետութեան գոյառումով: Ընկ. Թիւթիւնճեան ողջունեց Հայաստանի ժողովրդային յեղափոխութեան յաղթանակը, անդրադառնալով ՍԴՀԿ-ի արդ շարժումին բերած մասնակցութեան: Ան Կուսակցութեան անունով զօրակցութիւն յայտնեց վարչապետ Նիկոլ Փաշինեանի գլխաւորած կառավարութեան ու պատրաստակամութիւն՝ աջակցելով անոր կողմէ իրականացուող բարեփոխումներուն:

Օրհնութեան խօսք ուղղեց Արեւմտեան Ամերիկայի Թեմի առաջնորդ՝ Յովնան Արք. Տէրտէրեան:

Երեկոյի ընթացքին գործադրուեցաւ գեղարուեստական բարձրորակ յայտագիր, որուն իրենց մասնակցութիւնը բերին Նոր Սերունդ Մշակութային Միութեան պարախումբը, Թագուհի Արզումանեան, ասմունքով,  եւ երգիչ-երգչուհիներ՝ Յարութ Յակոբեան, Արաքսիա Ամիրխանեան եւ  Արնօ Մկրտչեան ազգային ու հայրենասիրական երգերով:

Հանդիսութիւնը խանդավառ մթնոլորտի մէջ փակուեցաւ «Հնչակեան Ենք Մենք» քայլերգով:

Ձեռնարկին աւելի մանրամասն կանդրադառնանք յաջորդիւ:

Հարակից Նյութեր

Leave a Comment