Հայաստանի Արտաքին Գործոց նախարարի պաշտօնին նշանակուելէ ետք Զօհրապ Մնացականեանը առաջին անգամ երկու օրէն Պրիւքսէլի մէջ պիտի հանդիպի Ատրպէյճանի արտաքին գործոց նախարար Էլմար Մամետեարովին:
Հայաստանի ու Ատրպէյճանի արտաքին գերատեսչութիւններու ղեկավարներու առաջին դէմ առ դէմ հանդիպումը նախաձեռնած են ԵԱՀԿ Մինսքի խումբի համանախագահները:
Պրիւքսէլ մեկնելէ առաջ Ատրպէյճանի արտաքին գործոց նախարարը յայտարարած է, որ «յառաջիկայ հանդիպումը ցոյց կու տայ, վերջապէս, Հայաստանը ղարաբաղեան հակամարտութեան կարգաւորման գործընթացին մէջ կառուցողական դեր պիտի խաղա՞յ, թէ՞ ոչ»: Ան կրկին պնդած է, թէ հակամարտութեան կարգաւորման գործընթացի առաջընթացի համար հայկական զօրքերը պէտք է դուրս բերուին «գրաւուած տարածքներէն»:
Արձագանգելով Մամետեարովի յայտարարութեան՝ Հայաստանի արտաքին գործոց նախարարութեան մամլոյ քարտուղար Տիգրան Բալայեանն ըսած է.- «Անկախ Մամետեարովի յայտարարութիւններից, մենք ունենք մեր յստակ դիրքորոշումը կարգաւորման, դրա հնարաւորութիւնների եւ ուղիների վերաբերեալ»:
Հայաստանեան քաղաքական փոփոխութիւններէն ետք առաջին անգամ իր հայաստանցի պաշտօնակիցին հետ հանդիպումէն առաջ Ատրպէյճանի արտաքին գործոց նախարարն երէկ յայտարարած է․ – «Եթէ Հայաստանի մէջ իշխանութեան եկած նոր ուժերը Սարգսեանի ռեժիմի ճանապարհով երթան, ապա անոնց նոյն ճակատագիրը կը սպասէ»:
Զօհրապ Մնացականեանի խօսքով՝ հայկական կողմը բանակցութիւններու սկզբունքներու առումով փոփոխութիւններ չունի․ – «Խաղաղ կարգաւորում, Մինսքի խմբի համանախագահների ֆորմաթ, խաղաղութեանը նպաստող միջավայր: Ես գծեցի այն, ինչը մեզ համար չափազանց կարեւոր է, առաջնային է՝ սթաթուս եւ անվտանգութիւն»:
Քաղաքագէտ Ստեփան Գրիգորեանի կարծիքով, հանդիպումէն երկու օր առաջ Ատրպէյճանի արտաքին գործոց նախարարի նման յայտարարութիւններն ի չիք կը դարձնեն բանակցութիւններուն մէջ յաջողութիւն գրանցելու որեւէ հնարաւորութիւն: Այդուհանդերձ, ըստ փորձագէտին, նման հանդիպումներն անհրաժեշտ են թէ՛ ճանաչողական, թէ՛ սահմանային լարուածութիւնը թուլացնելու նպատակով․ – «Անպայման պէտք է հանդիպել, ու այդ մեսիճը ուղղուած չէ Ատրպէյճանին: Այդ հանդիպումը կ’ապացուցի, որ Հայաստանը պատրաստ է միշտ կառուցողական մօտեցումով գործել, խաղաղ ճանապարհով լուծել»:
Քաղաքագէտը վստահ է, որ Մնացականեան – Մամետեարով առաջին հանդիպումէն որեւէ էական արդիւնք սպասել պէտք չէ: