Վարչապետ Նիկոլ Փաշինեան կը շարունակէ հաւատարիմ մնալ իր խոստումներուն: Կոռուպցիայի դէմ պայքարի գծով իրաւապահ մարմիններու գործողութիւնները դադար չունին: Ամէն օր ի յայտ կու գան նոր բացայայտումներ, որոնք կը հաստատեն ժողովուրդի մօտ տարիներ շարունակ գոյութիւն ունեցած կասկածները եւ քիչ մըն ալ աւելին: Պետական պիւտճէ կը վերադարձուին միլիոնաւոր տոլարներ, որոնք ապօրէն միջոցներով ու չարաշահումներով ձեռք ձգուած են նախկին մեծ ու փոքր իշխանաւորներու կողմէ: Ցարդ արձանագրուած բացայայտումները միայն մակերեսն են եւ անկասկած շատ աւելին ի յայտ պիտի գայ յաջորդող օրերուն եւ ամիսներուն:
Նիկոլ Փաշինեանի գլխաւոր խոստումներէն մին կը հանդիսանար 2008 թուականի Մարտի 1-ին ժողովուրդի դէմ գործադրուած բռնի միջոցներու հետեւանքով տասը անմեղ քաղաքացիներու սպանութեան բացայայտումը: Տասը տարի շարունակ այս հարցի ուղղութեամբ ոչ մէկ տեղաշարժ արձանագրուելէ ետք, քննչական մարմինները ձերբակալման առաջին որոշումը կայացուցին այդ ժամանակուայ պաշտպանութեան նախարար զօրավար-գնդապետ Միքայէլ Յարութիւնեանի նկատմամբ՝ բանակը ներքին քաղաքականութեան մէջ միջամուխ դարձնելու մեղադրանքով:
Յեղափոխութենէն կարճ ժամանակ առաջ, ընդդիմադիր պատգամաւորներու նախաձեռնութեամբ Ազգային Ժողովէն ներս Մարտ 1-ի սպանդին շուրջ տեղի ունեցած լսումներու ընթացքին, նախկին գլխաւոր դատախազին հարց տրուեցաւ, թէ արդեօ՞ք հարցաքննուած էր Ռոբերդ Քոչարեանը: Ոչ աւելի ոչ պակաս ան պատասխանեց՝ «հարցաքննել ի՞նչ ըսելու համար»:
Շնորհիւ յեղափոխութեան յաղթանակին, Ռոբերդ Քոչարեան վերջապէս կանչուած է հարցաքննութեան, պատասխանելու համար մէկ յստակ հարցումի. Ո՞վ հրաման տուաւ պաշտպանութեան նախարարին բանակը մտցնելու մայրաքաղաք եւ ապա կրակելու խաղաղ անցորդներու վրայ: Այստեղ բարդութիւններ չկան: Կամ այն է որ, պաշտպանութեան նախարարը գործած է ինքնագլուխ, որուն համար պէտք է պատասխանատուութեան ենթարկուի, եւ կամ՝ գործած է Ռոբերդ Քոչարեանի հրամանով:
Բոլորը հաւատացած էին, որ «Մարտի 1-ի» բացայայտումը կրնայ միայն ու միայն իրականանալ իշխանափոխութենէն ետք: Այսօր, տասնամեայ քողարկումէ ետք, «Մարտի 1»-ի գործը սկսած է շարժիլ իր տեղէն:
«ՄԱՍԻՍ»