Երէկ կառավարութեան նիստէն առաջ լրագրողներու հետ զրոյցի ժամանակ Ազգային անվտանգութեան ծառայութեան տնօրէն Արթուր Վանեցեանը՝ պատասխանելով լրագրողներու հարցին, թէ պարզ չէ՝ «Հայաստան» համահայկական հիմնադրամի տնօրէն Արա Վարդանեանը իւրացուցա՞ծ է այդ գումարները, վատնա՞ծ է, թէ վերադարձուցած է հիմնադրամին, ըսած է. «Իր յայտարարութեամբ այդ գումարները վերադարձրել է, բայց հիմա քննութիւն կ’իրականացնենք եւ պարզ կը լինի: Այս պահին չեմ կարող յստակ պատասխանել»:
Արթուր Վանեցեանը նշած է, որ այս պահուն միայն յստակ կրնայ ըսել, որ Արա Վարդանեանը հիմնադրամի դրամատնային քարտէն մօտ 130 միլիոն դրամ հանած է եւ խաղացած քազինոներուն մէջ:
ԱԱԾ տնօրէնը նաեւ ըսած է, որ Վարդանեանը հիմնադրամին տրամադրուած 25 միլիոն դրամի վարկային գիծով դրամատնային քարտէն օգտուած է մի քանի անգամ:
Դիտարկման, թէ փաստօրէն վերջնական չէ այն տեղեկութիւնը, որ տնօրէնն ամբողջութեամբ վերադարձուցած է գումարները, Արա Վանեցեանը անգամ մը եւս նշած է, որ այդ միայն իր յայտարարութիւնն է:
ԱԱԾ տնօրէնը նաեւ նշած է՝ միայն այն փաստը, որ օգտագործած է հիմնադրամի դրամատնային քարտը, արդէն քրէօրէն պատժելի արարք է:
Վանեցեանն անդրադարձած է նաեւ Պաշտպանութեան նախկին նախարար Միքայէլ Յարութիւնեանին: Հարցին, թէ՝ եթէ անոր մեղադրանք պէտք է առաջադրուէր, ինչո՞ւ ԱԱԾ-ն թոյլ տուած է, որ Յարութիւնեանը լքէ Հայաստանը, ԱԱԾ տնօրէնը պատասխանած է. «Նա դուրս է եկել այն ժամանակ, երբ նրա նկատմամբ որեւէ քրէական հետապնդում սկսուած չէր: ԱԱԾ-ն լիարժէք տիրապետում է ողջ իրավիճակին»:
Լրագրողները հարց ուղղած եւ հետաքրքրուած են, թէ հնարաւոր է ԱԱԾ-ն անդրադառնայ նաեւ Երեւանի քաղաքապետ Տարօն Մարգարեանի ունեցուածքին: «Քննութեան ընթացքում ընդհանուր Երեւան հիմնադրամի հետ կապուած այդ երեւոյթներն էլ են ուսումնասիրվում: Եթէ կը լինեն խախտումներ, գնահատականը կը տրուի»,- ըսած է Վանեցեանը: Ըստ անոր, Տարօն Մարգարեանը դեռ չէ հրաւիրուած հարցաքննութեան: Ան ըսած է, որ Տարօն Մարգարեանը միանշանակ Հայաստան է, իսկ թէ ուր կը գտնուի, չի գիտեր: