Վարչապետ Նիկոլ Փաշինեանն երէկ՝ 28 Յունիսին, ընդունած է 2016 թուականին ՊՊԾ գունդի գրաւման ժամանակ զոհուած ոստիկաններու ընտանիքներու անդամները եւ լսած անոնց բարձրացուցած խնդիրներն ու մտահոգութիւնները: «Լիարժէք կիսում եմ ձեր վիշտը եւ կարծում եմ՝ դա բոլորիս վիշտն է, որովհետեւ ես միշտ եղել եմ այն կարծիքին, որ ներհայաստանեան խնդիրների լուծման առումով մենք չպէտք է ունենանք բռնութեան որեւէ դրսեւորում: Նաեւ ուրախ եմ, որ այն յեղափոխութիւնը, որն իրականացրեցինք, տեղի ունեցաւ առանց որեւէ բռնութեան եւ մի կաթիլ արեան:
Ընդհանրապէս, երկար ժամանակ Հայաստանում այդ բանավէճը եղել է՝ արդեօք հնարաւոր են փոփոխութիւններ առանց բռնութեան: Ես միշտ եղել եմ այն կարծիքին, որ դրանք հնարաւոր են եւ ուրախ եմ, որ ի վերջոյ կարողացանք նաեւ դա ապացուցել»,- ըստ կառավարութեան մամլոյ ծառայութեան, ըսած է Նիկոլ Փաշինեանը, աւելցնելով, որ ՀՀ իւրաքանչիւր քաղաքացիի կեանքն իր համար բարձրագոյն եւ բացարձակ արժէք է եւ խնդիրները այդպէս կ’ընկալէ:
«Կարծում եմ, որ մեր գործունէութիւնը դա ապացուցել է: Մենք կարեւոր ենք համարում նաեւ հանրային համերաշխութեան վերականգնումը եւ այդ առումով իրական համերաշխութիւնն այն է, երբ լսելի են բոլոր կողմերը, լսելի են բոլոր տեսակէտները, հաշուի են առնուած բոլոր մարդկանց շահերը, յոյզերը եւ զգացմունքները: Այս առումով, կարեւոր եմ համարում հանդիպումը եւ շփումը ձեզ հետ»,- նշած է վարչապետը:
Անդրադառնալով դատական գործընթացին, Նիկոլ Փաշինեանն ընդգծած է. «Ես որպէս վարչապետ յայտարարել եմ, որ ընդհանրապէս դատարանների գործունէութեանը որեւէ միջամտութիւն չեմ ունենալու, որովհետեւ կարծում եմ, որ դա սխալ է եւ հենց այդ գործելակերպի պատճառով է նաեւ, որ մենք բազմաթիւ խնդիրներ ենք ունեցել: Բայց ինձ համար կարեւոր է նաեւ, որ մեր երկրում իւրաքանչիւր քաղաքացու իրաւունքը պաշտպանուած լինի, իսկ իրաւունք ունեն բոլոր քաղաքացիները: Իհարկէ, ինքս էլ գործընթացներին հետեւում եմ ես իմ քաղաքական դիրքորոշումներն արդէն արտայայտել եմ, որոնք, կարծում եմ, եղել են հաւասարակշռուած, այսինքն՝ չի եղել մի յայտարարութիւն, որը հաշուի կ’առնի քաղաքացիների մի մասի շահերը, իսկ միւսինը՝ ոչ:
Իհարկէ, մեր պարտաւորութիւնն է ապահովել քաղաքացիների անվտանգութիւնը, իրաւունքների պաշտպանութիւնը: Ինձ համար կարեւոր էր լսել ձեր տեսակէտները, դիրքորոշումները, որոնք դատավճիռ չեն կարող դառնալ, որովհետեւ ես դատավճիռ կայացնող չեմ եւ ոչ էլ կը ցանկանամ յայտնուել այդպիսի կարգավիճակում, բայց զուտ ընդհանուր պատկերացում ունենալու համար, թէ դուք ինչ էք մտածում այս իրավիճակի մասին, շատ կարեւոր էր լսել ձեզ: Եթէ յետագայում էլ լինի անհրաժեշտութիւն՝ պատրաստ եմ կրկին հանդիպել»,- ըսած է կառավարութեան ղեկավարը:
Վարչապետը զոհուած ոստիկաններու ընտանիքներու անդամներուն յորդորած է օգտուիլ դատավարական իրաւունքներէն, քանի որ անոնց պաշտպանութեան տեղը դատարանն է: «Այն մարմիններին, որոնք ենթարկւում են վարչապետին, կտամ յանձնարարականներ, որպէսզի ձեր բարձրացրած որոշ խնդիրներով զբաղուեն: Կիսում եմ ձեր եւ տարբեր պատճառներով մեր հանրութեան մէջ առկայ ցաւը: Ցաւօք, մեր երկրում կան շատ խնդիրներ եւ յոյս ունեմ, որ այս իրավիճակում կը կարողանանք բոլորս գալ ժողովրդի, պետութեան, օրինականութեան շահերից բխող եզրակացութիւնների եւ լուծումների»,- եզրափակած է Նիկոլ Փաշինեանը:
