Home ԳԼԽԱՒՈՐ ԼՈՒՐԵՐ Ռոպէրթ Քոչարեան, Սերժ Սարգսեան եւ Լեւոն Սարգսեան Զրկուեցան Գիւմրիի Պատուաւոր Քաղաքացիի Կոչումէն

Ռոպէրթ Քոչարեան, Սերժ Սարգսեան եւ Լեւոն Սարգսեան Զրկուեցան Գիւմրիի Պատուաւոր Քաղաքացիի Կոչումէն

by MassisPost

Գիւմրիի աւագանիի ընդդիմադիր «Կալա» խմբակցութեան նախաձեռնութեամբ աւագանիի նիստին Գիւմրիի պատուաւոր քաղաքացիի կոչումէն զրկուեցան Հայաստանի երկրորդ եւ երրորդ նախագահներ Ռոպէրթ Քոչարեանն ու Սերժ Սարգսեանը: Այդ կոչումէն զրկուեցան նաեւ Սերժ Սարգսեանի աւագ եղբայրը՝ Լեւոն Սարգսեանը:

«Կալա» խմբակցութիւնը նաեւ ԱԱԾ նախկին տնօրէն Կորիկ Յակոբեանը Գիւմրիի պատուաւոր քաղաքացիի կոչումէն զրկելու նախագիծ ներկայացուցած էր, սակայն աւագանին մերժեց այն, քանի որ առաջարկուած էր անոր կոչումէն զրկել յետմահու: Նախաձեռնութեան հեղինակներէն Լեւոն Բարսեղեան ըսած է՝ պէտք է մաքրուի պատուաւոր քաղաքացիներու ցուցակը: Ան կը պատրաստուի Կորիկ Յակոբեանին պատուաւոր քաղաքացիի կոչումէն զրկելու հարցը կրկին օրակարգ բերել:

«Կորիկ Գուրգենի Յակոբեանի մասով ես շատ եմ որոնել հիմքեր՝ հասկանալու համար, թէ տեսնես Գիւմրի քաղաքին բերած ի՞նչ օգուտների համար է այս մարդն արժանացել այդ կոչմանը: Եթէ այս որոշումը կը մերժուի, յաջորդ նիստին ենք առաջարկելու, յաջորդ նիստին կը մերժուի, յաջորդին ենք ներկայացնելու: Այնքան ժամանակ, մինչեւ Գիւմրիի պատմութիւնը մաքրագործուի: Ժամանակին արել են, սխալ են արել, ստիպուած են եղել, ճնշումների տակ են եղել եւ այլն, հարկաւոր է ազատուել այս ծանր ժառանգութիւնից»,- ըսած է Լեւոն Բարսեղեան:

Ռոպէրթ Քոչարեանին 2002 թուականին շնորհած են այդ կոչումը: Այն հիմնաւորմամբ, թէ «Լինսի» հիմնադրամի միջոցներով Գիւմրիի մէջ իրականացուած է բնակարանաշինական մեծ ծրագիր: Սերժ Սարգսեանն ալ այդ կոչման արժանացած է 2006 թուականին, երբ պաշտպանութեան նախարար էր: Թէ ինչու անոր կոչում շնորհուած է, որեւէ հիմնաւորում չէ ներկայացուած:

Սերժ Սարգսեանի եղբօրը՝ Լեւոն Սարգսեանին որպէս «Փիւնիկ» հիմնադրամի տնօրէն Գիւմրիի պատուաւոր քաղաքացիի կոչում շնորհելու շուրջ 2 տարի առաջ մեծ աղմուկ բարձրացաւ: Անոր այդ կոչումը կը շնորհէին հիմնաւորմամբ, թէ «Վերածնունդ» երաժշտական միջազգային փառատօնն է Գիւմրիի մէջ կը կատարէ: Պարզուած է, սակայն, որ այդ մրցոյթին մասնակցիլը անվճար չէ եղած:

Գիւմրեցիները դեռ 2 տարի առաջ շուրջ 2000 ստորագրութիւն հաւաքած են՝ Լեւոն Սարգսեանը պատուաւոր քաղաքացի կոչումէն զրկելու հարցը աւագանիի նիստի օրակարգ ընդգրկելու համար: Հարցը ընդգրկուեցաւ, սակայն աւագանին դէմ քուէարկեց: Վերջինս միայն այսօր զրկուեցաւ այդ կոչումէն: Այսպիսով՝ Գիւմրիի պատուաւոր քաղաքացիներու թիւը 61-էն նուազեցաւ 58-ի: Առաջիկային այլ անուններ եւս կը ներկայացուին՝ այդ կոչումէն զրկելու համար:

Հարակից Նյութեր

Leave a Comment