Կլէնտէլի Քաղաքապետական Խորհուրդը անցեալ Մարտ ամսուն, միաձայնութեամբ նախնական հաւանութիւն տուած էր «Միացեալ Հայ Երիտասարդներ » կազմակերպութեան առաջարկին` Կլէնտէլի Մարիլանտ պողոտայի մէկ հատուածը վերանուանել «Արցախ Պողոտայ »:
Քաղաքապետական Խորհուրդի որոշումը ուղարկուած էր Քաղաքաշինութեան Յանձնախումբին, իրենց կարծիքը եւս ստանալու համար: Շրջանի վաճառականներէն տարբեր պատճառաբանութիւններով ստացուած առարկութիւններու հիման վրայ, Յանձնախումբը տուած է բացասական կարծիք:
Յառաջիկայ Երեքշաբթի, Յունիս 12-ին, Քաղաքապետական Խորհուրդը դարձեալ պիտի քննարկէ անուանակոչութեան հարցը, վերջնական որոշում կայացնելու համար:
ՍԴՀԿ Հայ Ամերիկեան Խորհուրդը միանալով Միացեալ Հայ Երիտասարդներու նախաձեռնութեան, կոչ կ’ընեն Կլէնտէլի Հայ քաղաքացիներուն մեծ թիւով ներկայ գտնուելու Քաղաքապետական Խորհուրդի Յունիս 12-ի նիստին, երեկոյեան ժամը 6-ին, ու պահանջելու Խորհուրդի անդամներէն, «Արցախ Պողոտայի » հարցով վերահաստատելու իրենց նախկին որոշումը: