Համաշխարհային մամուլի ուշադրութեան կեդրոնը գտնուող հայաստանեան իրադարձութիւններուն լայնօրէն անդրադարձած են նաեւ թրքական առաջատար պարբերականները:
«Հայաստանը ցնցած յաւերժ ընդդիմադիրը, ո՞վ է Փաշինեանը», այսպէս է վերնագրած իր յօդուածը թրքական «Hürriyet» պարբերականի սիւնակագիր Ներտուն Հաճիօղլուն: Վերջին շաբաթներուն ան իր սիւնակի վրայ պարբերաբար անդրադարձած է Հայաստանի մէջ ընթացող զանգուածային ցոյցերուն: «Դեռ երեք շաբաթ առաջ Նիկոլ Փաշինեանը խորհրդարանի ետին շարքերուն նստող ընդդիմադիր քաղաքական գործիչ էր: Յայտարարելով, թէ Սերժ Սարգսեանը դրժած է իր խոստումը, ան զինուորական գունաւորմամբ հագուստներով փողոց դուրս եկաւ»,- գրած է թուրք յօդուածագիրը:
Հաճիօղլուն գրած է նաեւ Փաշինեանի անցած քաղաքական ուղիի եւ կերպարի մասին: «Ժողովուրդը զինք «հայ Չէ Գեւարա» կոչած է, իսկ Փաշինեան ինքզինք Նելսոն Մանտելային կը նմանցնէ»,- գրած է «Hürriyet»-ի սիւնակագիրը, ընդգծելով՝ Հայաստանի ընդդիմութեան առաջնորդը ոչ թէ անձերու, այլ համակարգի դէմ կը պայքարի:
Հայաստանեան «թաւշեայ յեղափոխութեան» եւ Նիկոլ Փաշինեանի մասին ուշագրաւ հրապարակում տեղ գտած է թուրքական «Bianet» հանդէսի մէջ: «Նիկոլ Փաշինեանը կսահակաշվիլիանա» վերնագիրով յօդուածին մէջ «Bianet»-ի յօդուածագիր Մուսթաֆա Էրտեմոլը զուգահեռներ իրականացուցած է Փաշինեանի եւ Վրաստանի «Վարդերու յեղափոխութեան» առաջնորդ, նախկին նախագահ Միխէիլ Սաակաշվիլիի միջեւ: «Գուցէ վաղաժամ կը կանխատեսէ, բայց եթէ Հայաստանի ընդդիմութեան առաջնորդ Նիկոլ Փաշինեանը այսպէս շարունակէ, ապա երկրորդ Սաակաշվիլին կը դառնայ»,-գրած է մեկնաբանը, ընդգծելով՝ «հայ առաջնորդը պէտք չէ կրկնէ Սաակաշվիլիի սխալը, ան պէտք չէ յոյսը դնէ Արեւմուտքի եւ ԱՄՆ-ի վրայ»:
Թրքական «Anadolu» գործակալութեան հրապարակած «Հայաստանի մէջ իշխանութիւնը ցնցած Փաշինեանը» յօդուածին մէջ ալ մանրամասն անդրադարձ կայ համաժողովրդական շարժման առաջնորդի քաղաքական կենսագրութեան: «Նիկոլ Փաշինեանը, որ նախքան ալ յայտնի էր իր ընդդիմադիր կեցուածքով, Հայաստանի մէջ վարչապետի պաշտօնէն Սերժ Սարգսեանի հրաժարականին հանգեցրած գործընթացի ճարտարապետը դարձաւ»,- գրած է «Anadolu»-ն:
Վերլուծելով Հայաստանի արտաքին քաղաքական ուղեգծի վերաբերեալ Փաշինեանի ըրած յայտարարութիւնները, թրքական գործակալութիւնը արձանագրած է, թէ ան եթէ վարչապետ դառնայ հայ-թուրքական յարաբերութիւններու հարցի մէջ փոփոխութիւն չ’ըլլար:
Թուրքական «Odatv»-ն ալ, մեկնաբանելով հայաստանեան իրադարձութիւնները, գրած է՝ «հակաիշխանական ցոյցերու եւ գործադուլներու միջոցով Երեւանի մէջ կեանքը կանգնեցուցած Փաշինեանը քայլ առ քայլ կ’երթայ դէպի յաղթանակ»: Թրքական «Haberler»-ն ալ արձանագրած է՝ «8 մայիսին Հայաստանը նոր վարչապետ պիտի ընտրէ»:
Վերջին շաբաթներուն Հայաստանի մէջ տեղի ունեցած բողոքի զանգուածային ցոյցերուն, գործադուլներուն, անհնազանդութեան գործողութիւններուն եւ բազմահազարանոց հանրահաւաքներուն պարբերաբար անդրադարձած են «Milliyet», «Cumhuriyet», «Sabah», «T24» պարբերականները, նաեւ «NTV»-ն, «HaberTürk»-ը, «YeniVakit»-ը, «TRTHaber»-ը, «GazeteVatan»-ը, «BBC»-ի, «Sputnik»-ի, «Deutsche Welle»-ի, «Euronews»-ի թրքական ծառայութիւնները:
Թուրքիոյ հայկական պարբերականներէն այդ իրադարձութիւնները լուսաբանած են «Ակօսը», «Ժամանակը», «Նոր «Մարմարան»: