Յունահռոմէական ըմբշամարտի աշխարհի եռակի, Ռիո-2016-ի ողիմպիականի ախոյեան Արթուր Ալեքսանեանը չորրորդ անգամ Եւրոպայի ախոյեանի կոչումը նուաճելէ ետք պատմած է տպաւորութիւններու մասին:
«Ասեմ, որ Եւրոպայի չորրորդ ախոյանութիւնը մի քիչ դժուար տրուեց, բայց կարելի է ասել, որ ինչի համար գնացել էինք, հասանք դրան: Ամէն ինչ շատ լաւ դասաւորուեց, լաւ մարզավիճակում էի: Այնքան էլ լաւ չէի մասնակցել նախորդ 2 Եւրոպայի առաջնութիւններին: Կային խնդիրներ, վնասուածքների պատճառով այնքան էլ լաւ մարզավիճակում չէի, բայց փառք Աստուծոյ, այս տարի ամէն ինչ լաւ էր եւ դարձայ Եւրոպայի ախոյան:
Հոգեբանական ճնշում չկար, իսկ լարուածութիւն կար: Լարուածութիւն միշտ կայ, բայց պէտք է գտնենք ճիշդ ճանապարհ եւ հասնենք արդիւնքի: Մրցակցութիւնը շատ բարձր մակարդակի վրայ էր, Եւրոպայի առաջնութիւնում թոյլ ըմբիշներ չեն լինում: Ճիշդ է, միաւոր չեմ տուել մրցակիցներին եւ հնարաւոր է, որ կողքից հեշտ թուայ, բայց շատ դժուար յաղթանակներ եղան:
Առաջին մրցակիցս Իսրայէլը ներկայացնող հայ ըմբիշ էր, սակայն մրցումների ժամանակ գորգի վրայ բոլորը մրցակից են: Գորգից դուրս նրանք ընկեր են, իսկ գորգի վրայ՝ մրցակցի: Այս յաղթանակը շատ կարեւոր էր մեր երկրի ու ժողովրդի համար: Ինչպէս նախորդ յաղթանակներս, այնպէս էլ այս յաղթանակը նուիրում եմ մեր հերոս զինուորներին»,- նշած է Արթուր Ալեքսանեանը:
Նշենք, որ աշխարհի ախոյեաններ Արթուր Ալեքսանեանն ու Մաքսիմ Մանուկեանը դարձան Եւրոպայի ախոյեան, իսկ 67 կգ քաշային Կարէն Ասլանեանը նուաճեց բրոնզեայ մետալ:
