Հայաստանի GALLUP International միութեան անդամ ԷՄ ՓԻ ՃԻ ընկերութեան իրականացուցած ընկերային հարցման մասնակիցներու մեծ մասը Ապրիլ 9, 2018էն ետք Հանրապետական կուսակցութեան հնարաւոր թեկնածուներէն վարչապետի պաշտօնին կը փափաքին տեսնել Սերժ Սարգսեանը եւ գործող վարչապետ Կարէն Կարապետեանը: Սերժ Սարգսեանը առաւել բարձր վարկանիշ ունի երկրի պաշտպանութեան եւ անվտանգութեան ապահովման, Լեռնային Ղարաբաղի հակամարտութեան կարգաւորման բանակցութիւններու վարման, արտաքին քաղաքականութեան իրականացման եւ բանակին վերաբերող հարցերու մէջ, Կարէն Կարապետեանի դիրքաւորումը առաւել բարձր է ընկերային-տնտեսական բնոյթի հիմնահարցերու լուծման տեսակէտէն:
Ապրիլ 5-ին լրագրողներու հետ հանդիպման «Էմ Փի ՃԻ» ընկերութեան տնօրէն Արամ Նավասարդեանը ընդգծած է, որ հարցման մասնակիցներուն տուած են հետեւեալ հարցը. «Համաձայն ՀՀ նոր Սահմանադրութեան վարչապետի դերակատարումն ունի առաւել մեծ կարեւորութիւն, հաշուի առնելով վերոնշեալը, Հանրապետական կուսակցութեան hնարաւոր թեկնածուներից ո՞ւմ կ’ուզենայիք տեսնել ՀՀ վարչապետի պաշտօնում Ապրիլ 9, 2018ից յետոյ»:
27.3 տոկոսը վարչապետի պաշտօնին կը փափաքին տեսնել Կարէն Կարապետեանը, 24.8 տոկոսը` Սերժ Սարգսեանը, 8.6 տոկոսը` պաշտպանութեան նախարար Վիգէն Սարգսեանը, 10.9 տոկոսն` այլ թեկնածուներ: ՀՀԿ-էն վարչապետի պաշտօնին ոչ մէկուն չեն նախատեսած 17.2 տոկոսը, հարցին պատասխանելու դժուարացած է 11.3 տոկոսը:
«Այսպիսով ակնյայտ է, որ ՀՀԿ-ի մէջ կայ երկու առաջատար թեկնածու` Կարէն Կարապետեանը եւ Սերժ Սարգսեանը»,- «Արմենբրես»-ի փոխանցմամբ` ըսած է Արամ Նավասարդեանը:
Ընկերային հարցումը իրականացուած է Մարտ 22-23, 2018 թուին Հայաստանի Հանրապետութեան ողջ տարածքին, որուն մասնակցած է 1120 մարդ:
