Home ՀԱՅԱՍՏԱՆ Հայաստանի Պետական Պարտքը Հասած է 6,9 Միլիառի

Հայաստանի Պետական Պարտքը Հասած է 6,9 Միլիառի

by MassisPost

2018 թուականը Հայաստանը կը սկսի պետական պարտքի տպաւորիչ աճով․ միայն Յունուարին պետական պարտքը աւելցած է 123,5 միլիոն տոլարով՝ ամսուայ վերջի դրութեամբ կազմելով 6 միլիառ 898 միլիոն տոլար:

Այն, որ Հայաստանի՝ 7 միլիառ տոլարի սահմանագիծին մօտեցած պետական պարտքը այս տարուայ ընթացքին պիտի  հատէ այդ շեմը, օրերս «Ազատութեան» հետ զրոյցի ժամանակ ըսած է ֆինանսներու նախարար Վարդան Արամեանը, նշելով, որ կը ծրագրեն այս տարի շուրջ 360 միլիոն տոլար նոր պարտք վերցնել: «Բացարձակ թուով մեր պակասորդը շուրջ 156 միլիառ [դրամ] է լինելու՝ մօտ 360 միլիոն տոլարի կարգի: Նախորդ տարուայ նկատմամբ դա էական նուազեցում է»,- ըսած է Արամեանը:

Ֆինանսներու նախարարը համեմատած է 2017 թուականի հետ: Անցած տարի Հայաստանի պետական պարտքը աւելցած է 832,5 միլիոն տոլարով: Ընդհանրապէս, պետական պարտքի աւելացման տեսանկիւնէն նախորդ երկու տարիները կ’առանձնանային՝ 2016-ին եւ 2017-ին իշխանութիւնները յաջողած են կուտակել լրացուցիչ գրեթէ 1,7 միլիառ տոլարի պարտք (1 միլիառ 696 միլիոն տոլար):

Թիւերը աւելի տպաւորիչ են, երբ կը համեմատես 2008 թուականի հետ: 10 տարի առաջ Հայաստանի պետական պարտքը կը կազմէր 1,9 միլիառ տոլար կամ աւելի քան 3,5 անգամ քիչ: Թէ այս նոյն ժամանակաշրջանին, երբ հայաստանցիներու պարտքը աճած է անգամներով, որքան աճած է անոնց բարեկեցութիւնը, ցոյց կու տան Համաշխարհային դրամատան թիւերը՝ եթէ 2008-ին մէկ շունչին ինկող ՀՆԱ-ն Հայաստանի մէջ կը կազմէր 4010 տոլար, ապա 2016-ին՝ աւելի քիչ էր՝ 3 614 տոլար (2017թ․ տուեալները դեռ հրապարակուած չեն):

Եթէ Հայաստանը մինչ այս կուտակած է, ապա յետայսու պէտք է մարէ: Պետական պարտքի մարման տեսանկիւնէն ամենածանր տարին 2020 թուականը պիտի ըլլայ․ այդ տարի պէտք է մարուի այսօրուայ հաշուարկով 736 միլիոն տոլար:

Վարդան Արամեանը վստահեցուցած է, որ կայ առնուազն չորս սենար, օրինակ՝ կրնան նոր պարտք վերցնել, փակել ընթացիկը, արդիւնքով՝ ժամանակ շահիլ եւ յետաձգել ամբողջական պարտքի մարումը: «Ամբողջական պարտքը, եթէ յիշողութիւնս չի դաւաճանում, շուրջ 736 միլիոն է, մեր պարտքի մարումը 2020 թուականին»,- ըսած է նախարարը:

Հարակից Նյութեր

Leave a Comment