Սոցիալ Դեմոկրատ Հնչակեան կուսակցութեան կեդրոնական գրասենեակը այցելեց ՀՀԿ-ի կողմէ Հայաստանի նախագահի թեկնածու առաջադրուած Արմէն Սարգսեան ու հանդիպում ունեցաւ կեդրոնական վարչութեան ներկայացուցիչներուն եւ Հայաստանի կառոյցի վարչութեան հետ:
Շուրջ երկու ժամ տեւած հանդիպման ժամանակ Հայաստանի Հնչակեան ղեկավարներուն Արմէն Սարգսեան ներկայացուց իր ծրագրերը, լսեց կարծիքներ եւ առաջարկներ ներկաներուն կողմէ:
ՍԴՀԿ Կեդրոնական Վարչու-թեան անդամ Նարեկ Գալստեան հանդիպումի մասին «Առաւօտ» թերթին յայտնած է որ, Արմէն Սարգսեանին ուղղած են իրենց յուզող բազմաթիւ հարցեր ու ստացած` պատասխաններ:
Այն հարցին թէ ՍԴՀԿ պատրաստ է սատարելու Արմէն Սարգսեանի թեկնածութեան, Գալստեան յայտնած է որ, իրենց սատարել-չսատարելը խորհրդանշական պիտի ըլլայ, քանի որ խորհրդարանական կուսակցութիւն չեն, բայց եթէ Արմէն Սարգսեան որոշէ առաջադրուիլ, իրենց կարծիքը դրական է:
Ըստ Նարեկ Գալստեանին, Սահմանադրութեամբ նախագահին տրուած լիազօրութիւններու շրջանակը, ինչպէս նաեւ Արմէն Սարգսեանի կերպարն ու խարիզման կրնան նպաստներ բերել Հայաստանի յառաջընթացին:
Այն հարցին թէ արդեօ՞ք Արմէն Սարգսեան հրաժարի Սերժ Սարգսեանի առաջարկէն եւ իր թեկնածութիւնը չառաջադրէ ՀՀ չորրորդ նախագահի պաշտօնին, Ընկ. Գալստեան ըսած է. «Ես չեմ կարող մեկնաբանել: Մենք ընդունում ենք ի գիտութիւն Արմէն Սարգսեանի ասածը. ինչպէս բոլորին, այնպէս էլ մեզ ասում է, որ հանդիպումներից յետոյ իր վերջնական որոշումը կը կայացնի եւ կը հրապարակի»: