Հակառակորդը պարբերաբար սահմանին անօդաչու թռչող սարքեր կը կիրառէ, որու դէմ համարժէք քայլեր կ’իրականացնենք: «Արցախբրէս»-ի թղթակիցի հաղորդմամբ՝ այս մասին երէկ՝ 24 յունուարին կայացած մամլոյ ասուլիսին ըսած է ԱՀ պաշտպանութեան նախարար Լեւոն Մնացականեանը: Նախարարի տեղեկացմամբ՝ ներկայիս անվտանգութեան ապահովման հարցերու գերակշիռ մասը կը վերաբերի անօդաչու թռչող սարքերէն ՊԲ անձնակազմի պաշտպանութեան:
«Տարբեր միջոցներով այդ ուղղութեամբ քայլեր ենք ձեռնարկում»,- նշած է Լ. Մնացականեանը եւ աւելցուցած, որ բանակի մէջ այս առումով թեխնոլոկիական լուրջ համալրումներ կը կատարուին, որոնք էական նշանակութիւն պիտի ունենան հակառակորդին հակազդելու համար:
Ամփոփելով տարին, բանակի հրամանատարը նշած է, որ պաշտպանութեան բանակը յաջողած է պահպանել խաղաղութիւնը եւ Արցախի ժողովուրդի անվտանգութիւնը, վստահեցնելով, որ ՊԲ-ն ի զօրու է կանխել հակառակորդի ցանկացած ոտնձգութիւն եւ պատուով կատարել իր առջեւ դրուած մարտական խնդիրը:
Հանդիպման աւարտին բանակի հրամանատարը պատասխանած է լրագրողներուն հետաքրքրող բազմաբնոյթ հարցերուն, որոնք հիմնական կը վերաբերէին մօտ ապագային պատերազմի վերսկսման հաւանականութեան, բանակի նիւթաթեխնիքական ապահովման, զինծառայողներու ընկերային-կենցաղային պայմաններու բարելաւման, «Պատիւ ունիմ» եւ «Ես եմ» ծրագիրներու ներդրմանը եւ այլն: