19 Յունուարին «Ելք» դաշինքը բողոքի ցոյց պիտի իրականացնէ ընդդէմ թանկացումներուն։ Այս մասին երէկ «Ազատութեան» հետ զրոյցի ժամանակ ըսած է «Ելք» խմբակցութեան պատգամաւոր Արարատ Միրզոյեանը։
«Խնդիրը յստակ ձեւակերպուած է՝ ո՛չ թանկացումներին եւ հարկային բեռի, եկամտային հարկի վերադարձ առնուազն նախկին սանդղակին, եւ հարկի գների վերադարձ դէպի նախկինին։ Սա է խնդիրը։ Բնականաբար, ակնկալուող արդիւնքն էլ այդ խնդրի լուծումն է։ Սա շատ էական, շատ կենսական նշանակութիւն ունեցող, մարդկանց կեանքի որակի վրայ անմիջականօրէն անդրադարձող խնդիր է, որը յուզում է բոլորին», – ըսած է Միրզոյեան, շարունակելով. – «Ես կարծում եմ, որ հասարակութեան լայն զանգուածները ոտքի կը կանգնեն եւ իրենց մասնակցութեամբ ցոյց կտան աջակցութիւն այս խնդիրների լուծմանը հետամուտ լինելուն, որից արդէն «Ելք» դաշինքը եւ մասնաւորապէս, խմբակցութիւնը քայլեր կը ձեռնարկի, օրէնսդրական փոփոխութիւններ կը նախաձեռնի, որպէսզի վերադարձ լինի առնուազն նախկին մակարդակին»։
Այն դիտարկման, թէ մարդիկ յուսահատած են, այլեւս չեն հաւատար փոփոխութիւններուն եւ արդէն այլեւս փողոց դուրս չեն գար, ընդդիմադիր պատգամաւորը այսպէս արձագանգած է. – «Նախ որ փողոց դուրս չեն գալիս, դա թոյլ է տալիս պարանն աւելի ու աւելի սեղմե՞լ էս մարդկանց վզին։ Լաւ, չեն բողոքում, եկէք եկամտային հարկը սարքենք ոչ թէ 28, այլ 50 տոկոս, պենզինը (վառելանիւթ) թանկացնենք ոչ թէ 20 դրամով, այլ 100 դրամով։ Չեմ հասկանում, իրենք ընդհանրապէս անպատժելի՞ են իրենց զգում։ Թող ոչ մէկը այդքան վստահ չլինի, մի վայրկեան է, ցասումը, որ հասաւ ինչ-որ պահի ու ժողովուրդը ոտքի կանգնեց սրբելու է դրանց տանի։ Խօսքը սնունդի, թրանսփորթի (տեղափոխութեան միջոցներու) մասին է, եւ այստեղ ոչ մի նորմալ մարդ չի կարող բազմոցին նստած հետեւել, թէ ինչ է կատարւում երկրում։ Սա բոլորին է վերաբերում։ Ես կարծում եմ, որ բոլոր նախադրեալները կան, որ մարդիկ ոտքի կանգնեն։ Ես կրկնում եմ սոցիալական (ընկերային) ապստամբութիւնը լաւ բան չի, բայց եթէ չկայ ալթերնաթիւ (փոխարինող), եթէ էս մարդիկ իրենց չափը չեն զգում եւ ասում են՝ «մէկ ա չեն բողոքում մարդիկ, եկէք էս էլ բարձրացնենք, էս էլ», էդ դէպքում անխուսափելի է դառնում»։
