ՀՀ խորհրդարանը մերժած է քառօրեայ նիստի օրակարգին մէջ դրուած Եւրասիական Տնտեսական Միութենէն դուրս գալու մասին «Ելք» դաշինքի յայտարարութեան նախագիծը: Ազգային Ժողովի 76 պատգամաւորներ դէմ քուէարկած են, միայն 6-ը` կողմ:
ՀՀԿ-ական պատգամաւոր Սամուէլ Ֆարմանեան նշած է. «ԵՏՄ-ԵՄ քննարկումների հետ կապուած պէտք է արձանագրել հետեւեալը` ՀՀ-ին յաջողուել է գրեթէ ոսկերչական ճշգրտութեամբ արտաքին քաղաքականութեան ոլորտում առաջ տանել ՀՀ շահերը: ԵՏՄ-ԵՄ արհեստական հակադրութիւնը չի բխում Հայաստանի շահերից եւ վստահ եմ, որ մեզնից ձախ նստած խմբակցութիւնը եւս դա լաւ գիտակցում է»:
«Ելք» խմբակցութեան պատգամաւոր Էտմոն Մարուքեան իր հերթին անդրադառնալով Ֆարմանեանի ելոյթին ըսած է. «Հակադրութիւն եղել է մեր հանրապետական գործընկերների ներկայացրած փաստարկների մէջ: Ես ձեզ առաջարկում եմ մարզեր այցելել եւ մարդկանց բացատրել, թէ ինչու են ապրանքներն այսքան թանկանում եւ Յունուարի 1-ից ինչու են թանկանալու: Մարդկանց բացատրէք, որ Հայաստանը զարգանում է, բացատրէք, որ ապրանքները չեն թանկանում»:
Անոր խօսքով, այս տարիներու ընթացքին չկայ մէկ ուսումնասիրութիւն, որ կը խօսի այն մասին, որ ԵՏՄ-ն օգուտ է Հայաստանին: «Դրա համար էլ տեղի ունեցան ահասարսուռ քննարկումներ, ու ահաբեկման ֆոնին էլ քննարկւում էր մեր նախագիծը: Ձեր կողմից հակառուսական տրամադրութիւններ են Հայաստանում տարածուել, վստահ եմ, որ ՌԴ ձեր գործընկերները հիասթափուած են ձեզանից, որ այդքան հակառուսականութիւն էք տարածում մեր ժողովրդի մէջ»:
Մարուքեան նշած է նաեւ, որ ՌԴ-ի ու իշխանութեան ներկայացուցիչներուն համար Հայաստանը չի դիտարկուիր որպէս զարգացող Հայաստան, ՌԴ դաշնակից Հայաստան:
ՀՀԿ խմբակցութենէն Հերմինէ Նաղտալեանն ալ նշած է. «Այն եզրահանգումները, որ արւում են, թէ թանկացումները կապուած են ԵՏՄ-ի հետ, չկայ որեւէ տնտեսական հիմնաւորում դրա վերաբերեալ, որ ներդրումները դրա համար են նուազել»: