Երէկ Պրիւքսէլի մէջ հանդիպելով Ատրպէյճանի նախագահ Իլհամ Ալիեւին, Հիւսիսաթլանթեան դաշինքի գլխաւոր քարտուղար Եէնս Սթոլթընպըրկ ընդգծած է, որ ղաաբաղեան հակամարտութիւնը չի կրնար ռազմական ճանապարհով կարգաւորուիլ․ – «Այսօր մենք քննարկեցինք Հարաւային Կովկասի մէջ տարածաշրջանային անվտանգութիւնը: Լեռնային Ղարաբաղի չկարգաւորուած հակամարտութիւնը մտահոգութեան առիթ է: Յստակ է, որ այստեղ ռազմական լուծում չի կրնար ըլլալ: ՆԱԹՕ-ն այս հարցին մէջ ուղիղ դերակատարութիւն չունի, մենք կ’աջակցինք ԵԱՀԿ Մինսքի խումբի համանախագահներուն, եւ ես ուրախ եմ լսել, որ դուք վերսկսած էք բանակցութիւնները Հայաստանի նախագահի հետ: Մենք կը քաջալերենք ձեզ շարունակել բանակցային կարգաւորման այդ ճանապարհն ու խուսափիլ իրավիճակի նոր սրացումներէն»:
Ատրպէյճանի նախագահը շրջանցած է բանակցութիւններու շարունակման ու հրադադարի պահպանման յորդորները՝ վերստին պնդելով, թէ խնդրի կարգաւորումը կը ձգձգուի հայկական կողմի պատճառով․ – «Տարածաշրջանի անվտանգութեան սպառնացող ամենամեծ վտանգը Հայաստանի ու Ատրպէյճանի միջեւ չկարգաւորուած հակամարտութիւնն է: Տարիներ շարունակ մեր տարածքները կը գտնուին հայերու բռնագրաւման տակ: Աւելի քան մէկ միլիոն ատրպէյճանցիներ դարձած են փախստական ու բռնի տեղահանուած, անոնց դէմ ցեղային զտումներ իրականացուած են: Եւ այդ իրավիճակը չի փոխուիր»:
Հանդիպումէն երք ՆԱԹՕ-ի կեդրոնակայանէն ներս հրաւիրուած Սթոլթընպըրկի հետ համատեղ ասուլիսի ժամանակ Ալիեւ կրկին յիշեցուցած է ՄԱԿ-ի Անվտանգութեան խորհուրդի կողմէ ընդունուած բանաձեւերն ու պնդած, թէ հայկական կողմը պէտք է հետեւի անոնց ու անյապաղ, առանց նախապայմաններու դուրս բերէ ուժերը գրաւեալ տարածքներէն․ – «Խնդիրը պէտք է կարգաւորուի ՄԱԿ-ի Անվտանգութեան խորհուրդի այդ բանաձեւերու եւ Ատրպէյճանի տարածքային ամբողջականութեան հիման վրայ: Ատրպէյճանի տարածքային ամբողջականութիւնը ողջ աշխարհն կը ճանչնայ»:
Ատրպէյճանի նախագահը երէկ Պրիւքսէլի մէջ մասնակցած է ՆԱԹՕ-ի խորհուրդի նիստին:
Ղարաբաղեան խնդիրէն բացի կողմերը քննարկած են նաեւ երկկողմ համագործակցութիւնը ամրապնդելու հնարաւորութիւնները: