Թուրքիոյ խորհրդարանէն ներս կ’ընթանան 2018 թուականի պիւտճէի նախագիծի քննարկումներ, որոնց ծիրէն ներս 7 նոյեմբերին ներկայացուած է Կրթութեան նախարարութեան համար նախատեսուած պիւտճէն: Քննարկման ժամանակ ելոյթ ունեցած է մեճլիսի պոլսահայ պատգամաւոր Կարօ Փայլանը: Այս մասին գրած է «Էրմէնիհապէր» կայքը:
Թրքական «Demokrathaber» լրատուական կայքի տեղեկացմամբ, Փայլան քննադատած է կրթական համակարգի փոփոխութիւնները:
Ան դժգոհած է, որ Կրթութեան նախարար Իսմէթ Եըլմազ ելոյթին մէջ ընդհանրապէս չէ անդրադարձած այդ փոփոխութիւններուն: Փայլան անդրադարձած է նաեւ նախարարութեան թվիթըրեան էջին մէջ եղած գրառումներէն մէկուն «որակեալ կրթութիւն» (կրթական համակարգի փոփոխութիւններուն մաս կը կազմէ՝ խմբ.) արտայայտութեանը՝ ընդգծելով, որ այդ կերպ Եըլմազ ինքնըստինքեան թրքական դպրոցներու 90 տոկոսը անորակ համարած է:
Պոլսահայ պատգամաւորը քննադատած է Թուրքիոյ կրթական քաղաքականութիւնը՝ նշելով, որ կրթութեան հիմքը կրօնը դրուած է:
«Կրօնական կրթութիւնը, հաւատացեալ սերունդ դաստիարակելու նպատակը, որու մասին խօսած է նախագահ Էրտողան, դարձուցեր էք ձեր նախարարութեան գլխաւոր առաքելութիւնը: Մինչդեռ սա ուղղուածութիւններէն մէկը պէտք է ըլլար: Ո՞ւր մնաց գիտական, ժողովրդավարական եւ հաւասար կրթութիւնը»:
Նշենք, որ Կրթութեան նախարարութեան Twitter-ի էջին կրթական համակարգի փոփոխութիւններու մասին գրառում կատարուած էր՝ դպրոցներու մէկ մասի հասցէին կիրառելով՝ «որակեալ կրթութիւն» արտայայտութիւնը:
Քննադատութիւններու տարափի պատճառով գրառումը ջնջած են: Եըլմազ բացատրած է, որ «որակեալ կրթութիւն» արտայայտութիւնը կը վերաբերի դպրոցներուն, որոնք աշակերտ կ’ընդունին միայն քննութեամբ: Առանց քննութիւն յանձնելու երեխաները կրնան ընդունուիլ տան մօտակայքը գտնուող 5 դպրոցներէն մէկը:
Քննադատութիւններուն արձագանգելով, Եըլմազը նշած է. «Մէկին լաւ ըսելով, միւսները վատ չեն դառնար»: