Թուրքիոյ Այնթապ քաղաքի պատմական հայկական տուները վերածուած են հիւրանոցներու: Թրքական «Հապերլէր» լրատուական կայքը, անդրադառնալով թեմային, կը գրէ, որ դարաւոր պատմութիւն ունեցող հայկական տուները, որոնք ձմրան տաք պահող, իսկ ամրան զովութիւն ապահովող քարերով կառուցուած են, այսօր քաղաք այցելող զբօսաշրջիկներու կողմէ մեծ հետաքրքրութեան կ՛արժանանան:
Աղբիւրին համաձայն, տուները, որոնք այսօր վերածուած են հիւրատուներու, 200-300 տարուան պատմութիւն ունին: Հիւրատուներէն մէկու տնօրէն Զէյնել Օզքարամանը պատմած է, որ պատմական յուշարձաններ հանդիսացող այս տուները հայերէն մնացած են. տուներէն մէկուն վրայ նոյնիսկ հայերէն մակագրութիւն կայ: Օզքարամանը նշած է, որ հիւրատունը մեծ պահանջարկ կը վայելէ, եւ գրեթէ միշտ շաբաթավերջին ազատ սենեակ չ՛ըլլար: Հիւրատուներուն մէջ երկտողանոց սենեակի գիշերակացը, նախաճաշը ներառեալ, արժէ 150-200 (մօտ 20000 դր.) լիրա: