Ռուսիա օրերս Հայաստան պիտի մատակարարէ զէնքի խմբաքանակ` գործող պայմանագրի ծիրէն ներս: Իսկ 100 միլիոն տոլարի նոր, արդէն ստորագրուած վարկային համաձայնագրի իրականացումը պիտի սկսի, երբ բոլոր միջպետական մակարդակներու վրայ հաստատուի: «Արմէնբրէս»-ի փոխանցմամբ, այդ մասին «Ռիա նովոսթի»-ին տուած հարցազրոյցի ժամանակ ըսած է Հայաստանի Հանրապետութեան նախագահ Սերժ Սարգսեան:
«Մինչեւ այս տարուան վերջ մենք պիտի իրականացնենք դեռ նախորդ պայմանագիրը: Օրերս մենք կը սպասենք նոր մատակարարումներու, եւ մինչեւ տարուան վերջը մենք պիտի փակենք նախորդ պայմանագրի հետ կապուած բոլոր հարցերը»,- ըսած է Սերժ Սարգսեան:
«Մենք արդէն Երեւանի մէջ ստորագրած ենք նոր պայմանագիր, անիկա պէտք է անցնի բոլոր ռուսական եւ հայկական ատեանները, այնուհետեւ` վաւերացման ընթացակարգը, իսկ արդէն ատկէ ետք մենք պիտի սկսինք աշխատանքի ռուսական կողմէն համապատասխան արտադրողներու հետ այդ ծրագրի իրականացման համար: Ատիկա, ցաւօք, այդքան արագ չ՛ըլլար»,- աւելցուցած է Հայաստանի նախագահը:
2015-ի Յունիսին ստորագրուած է Ռուսիոյ կողմէ Հայաստանին 200 միլիոն տոլարի պետական վարկ տրամադրելու մասին համաձայնագիր` ռուսական արտադրութեան ռազմական արտադրանք ձեռք բերելու համար: Համաձայն նոր համաձայնագրի նախագիծին, որուն Հայաստանի կառավարութիւնը հաւանութիւն տուած է 2017-ի Հոկտեմբեր 12-ին, Ռուսիան հայկական կողմին պիտի տրամադրէ 100 միլիոն տոլարի պետական արտահանման վարկ` ռուսական արտադրութեան ռազմական նշանակութեան արտադրանքներու մատակարարումները ֆինանսաւորելու համար:
Համաձայնագրի նախագիծին մէջ կը նշուի, որ վարկը կը տրամադրուի 15 տարի մարման ժամկէտով, տարեկան 3 տոկոս տոկոսադրոյքով: Հայաստանը պէտք է օգտուի վարկային միջոցներէն 2018-2022 թուականներուն:
