Վարչապետ Կարէն Կարապետեան այսօր ընդունած է Հայաստանի մօտ Ամերիկայի Միացեալ Նահանգներու դեսպան Ռիչըրտ Միլսն ու ԱՄՆ Միջազգային զարգացման գործակալութեան (USAID) հայաստանեան առաքելութեան տնօրէն Տեպորա Կրիսըրը:
Ըստ կառավարութեան պաշտօնական կայքէջին, Կարէն Կարապետեան եւ Ռիչըրտ Միլս քննարկած են հայ-ամերիկեան յարաբերութիւններու օրակարգին վերաբերող շարք մը հարցեր: Զրուցակիցները նախ եւ առաջ անդրադարձած են կաշառակերութեան դէմ պայքարի բնագաւառին մէջ համագործակցութեան, քննարկած ընթացիկ աշխատանքներն ու յետագայ կատարելիքները:
Վարչապետը նշած է, որ կառավարութիւնը, իր ծրագիրին համապատասխան, կը շարունակէ կաշառակերութեան դէմ պայքարի ոլորտին մէջ իրավիճակի բարելաւման հետեւողական քաղաքականութիւնը 3 հիմնական ուղղութեամբ. կաշառակերութեան վտանգի նուազեցում, օրինաչափական-օրէնսդրական դաշտի արդիականացում ու կատարելագործում եւ Կաշառակերութեան դէմ պայքարի խորհուրդի աշխոյժ աշխատանք:
Այս համապատկերին մէջ Կարէն Կարապետեան կարեւորած է ԱՄՆ օժանդակութիւնը Հայաստանի կառավարութեան քայլերուն, որ կրնայ դրսեւորուիլ ե´ւ Կաշառակերութեան դէմ պայքարի խորհուրդի գործունէութեան, ե´ւ միւս ուղղութիւններով իրականացուող բարեփոխումներուն աջակցութեան տեսքով:
Դեսպանը ողջունած է կաշառակերութեան դէմ պայքարին եւ գործարարութեամբ զբաղելու միջավայրի բարելաւման ուղղուած վարչապետին ջանքերը, որոնք նպաստած են Հայաստանի նկատմամբ ամերիկեան ներդրողներու հետաքրքրութեան աճին:
Ան նշած է, որ վերջին 8-10 ամսուայ ընթացքին Հայաստանի մէջ գործող ամերիկեան ընկերութիւններէն դրական ազդակներ ստացած է յատկապէս մաքսային ոլորտին մէջ կատարուող բարեփոխումներու առնչութեամբ:
Ռիչըրտ Միլս վերահաստատած է ԱՄՆ պատրաստակամութիւնը, շարունակելու աջակցութիւնը Հայաստանի կառավարութեան կաշառակերութեան դէմ պայքարի գործին մէջ, եւ այժմ կը քննարկուի այդ նպատակով յատկացուող միջոցներու վերաուղղորդման եւ օժանդակութեան առաւել արդիւնաւէտ ուղին գտնելու հարցը:
«Հանդիպմանն անդրադարձ է եղել նաեւ 2 տարի առաջ մեկնարկած «Իմ Հայաստան. մշակութային զբօսաշրջութիւնը Հայաստանում» ծրագրի ընթացքին: Այն մշակուել է Հայաստանի կառավարութեան, ԱՄՆ ՄԶԳ եւ մշակոյթի պահպանման ասպարէզում յայտնի Սմիթսոնեան ինսթիթութի համագործակցութեան շրջանակում եւ միտուած է ազգային մշակոյթի պահպանմանը՝ Հայաստանում մշակութային զբօսաշրջութեան զարգացման միջոցով», – նշուած է հաղորդագրութեան մէջ:
Կողմերը միտքեր փոխանակած են նաեւ ՀՀ-ԱՄՆ համագործակցութեան առնչուող շարք մը այլ հարցերու շուրջ: