ԱՄՆ-ի մօտ Թուրքիոյ դեսպանի կեցավայրին դիմաց խաղաղ ցուցարարներու դէմ յարձակում իրականացնելու դէպքին առթիւ ձերբակալուած երկու թուրքի գործով Ուաշինկթընի մէջ 7 Սեպտեմբերին տեղի ունեցած է առաջին դատական նիստը: Ձերբակալուած ամերիկաբնակ թուրքերը՝ 45-ամեայ Սինան Նարին եւ 50-ամեայ Էյուփ Եըլտըրըմ յայտարարած են, որ չեն ընդունիր իրենց դէմ ներկայացուած մեղադրանքները: Այս մասին կը յայտնէ «Washington Times»:
Թուրքերը դատարան բերուած են ձեռքերն ու ոտքերը շղթայուած: Էրտողանի կողմնակիցները հրաժարած են արագ դատավարութեան իրենց իրաւունքէն, թոյլ տալով պաշտպանուող կողմի իրաւապաշտպաններուն մինչեւ յաջորդ դատական նիստը՝ 10 Հոկտեմբերը ուսումնասիրել ներկայացուած մեղադրանքները:
Եըլտըրըմ եւ Նարին կը մեղադրուին ատելութեան շարժառիթներով յարձակում գործելու մէջ, բան մը, որ անոնց պատիժը կրնայ 1.5 անգամով աւելցնել: Երկու տղամարդոց դէմ ներկայացուած են նաեւ կանխամտածուած բռնութեան յանցագործութիւն իրականացնելու մեղադրանքներ՝ քրէօրէն պատժելի յանցանք, որ կը նախատեսէ մինչեւ 15 տարուայ ազատազրկում:
Դատական լսումներուն մասնակցած է նաեւ Թուրքիոյ դեսպանութեան ներկայացուցիչը, որ, սակայն, հրաժարած է մեկնաբանութիւն տալ:
Եըլտըրըմ ու Նարին Թուրքիոյ եւ Միացեալ Նահանգներու քաղաքացիներ են: Անոնք երկուքն են այն 19 անձերէն, որոնց դէմ Ուաշինկթընի դատախազութիւնը մեղադրանք առաջադրած է Էրտողանի այցի ժամանակ խաղաղ ցուցարարներու վրայ յարձակում իրականացնելու գործով: 19 անձերէն 15-ը Էրտողանի թիկնազօրի անդամներն են: Ուաշինկթընի ոստիկանութիւնը պարզած է անոնցմէ 12-ին ինքնութիւնը: Ազատութեան մէջ գտնուող 17 մեղադրեալները ներկայիս Թուրքիա եւ Գանատա են:
Թուրքիոյ նախագահ Էրտողան յաջորդ շաբաթ պիտի այցելէ Նիւ Եորք՝ մասնակցելու համար ՄԱԿ-ի Գլխաւոր ժողովի նստաշրջանի բացման: Տակաւին յայտնի չէ, թէ արդեօք Ուաշինկթընի մէջ ծեծկռտուքին մասնակցած անոր թիկնազօրի անդամները պիտի ուղեկցի՞ն իրեն, թէ ոչ:
Ուաշինկթընի ոստիկանապետ Փիթըր Նիւշէմ 15 Յունիսին մամլոյ ասուլիսի ժամանակ յայտարարած էր, որ եթէ թիկնազօրի այդ անդամները վերադառնան ԱՄՆ, անոնք դիւանագիտական անձեռնմխելիութիւն պիտի չունենան եւ ժամանելուն պէս պիտի ձերբակալուին: