Լեռնային Ղարաբաղի հարցի շուրջ համաձայնութեան եզրեր գտնելու առաքելութիւն ունեցող` Մինսկի Խումբէն ներս ամերիկացի համանախագահ Ռիչըրտ Հոկլանտ, իր պաշտօնավարման աւարտին կատարեց զգայացունց յայտարարութիւն, ներկայացնելով հարցի լուծման այն կէտերը, որոնք ծանօթ են նաեւ, որպէս «մատրիտեան սկզբունքներ» անունով:
Թէեւ դեսպանի յայտարարած կէտերը գաղտնիք չէին եւ անոնց մասին տարբեր առիթներով հրապարակումներ եղած էին, սակայն այս առաջին անգամն է որ, Մինսկի Խումբի մէկ անդամը կէտ առ կէտ կը ներկայացնէ մատրիտեան այն սկզբունքները, որոնց շուրջ, կարգ մը շրջանակներու պնդումով, Հայաստան տուած է իր նախնական համաձայնութիւնը, սակայն Ատրպէյճան` ոչ:
Ամերիկացի դիւանագէտի յայտարարութիւնը մտահոգութեան մեծ ալիք յառաջացուց Հայաստանի քաղաքական շրջանակներուն մօտ: Ոմանք այս կէտերու հրապարակման մէջ տեսան Ամերիկայի պաշտօնական դիրքորոշում ի նպաստ Ատրպէյճանի: Ուրիշներու մեկնաբանութիւնը այն էր որ, Միացեալ Նահանգները կը փորձէ իր դիրքերը ամրապնդել կովկասեան տարածաշրջանէն ներս` հաւասարակշռելու համար ռուսաստանի ազդեցութիւնը:
Մենք հակուած ենք առաջին տեսակէտին, նկատի առնելով, որ Ամերիկայի ներկայ վարչակազմը դադրած է Ռուսաստանը նկատել իր ռազմավարական մրցակիցը: Միւս կողմէ, Միացեալ Նահանգներու արտաքին յարաբերութիւններու պետական քարտուղարութիւնը ներկայիս կը գլխաւորէ Ռիք Թիլլըրսոն, որ մինչեւ վերջերս քարիւղի աշխարհի մեծագոյն ընկերութիւնը նկատուող «Էքսոն-Մոպիլի» ղեկավարն էր: Իսկ այդ ընկերութիւնը միլիառաւոր տոլարներու հասնող ծրագիրներ ունի ե~ւ Ատրպէյճանի ե~ւ Ռուսաստանի մէջ: Ասկէ անկախ, նախագահ Տոնալտ Թրամփի եւ ատրպէյճանցի օլիկարխներու միջեւ գոյութիւն ունեցող կապերու մասին անդադար տեղեկութիւններ ի յայտ կու գան Ամերիկեան մամուլի էջերուն վրայ:
Ի~նչ որ ալ ըլլան այս յայտարարութեան դրդապատճառները, ներկայացուած կէտերը անընդունելի են առաջին հերթին Արցախի ժողովուրդին կողմէ ու կը պարունակեն խիստ վտանգաւոր շեշտադրումներ: Կարելի չէ վստահիլ միջազգային ապագայ երաշխիքներուն: Լեռնային Ղարաբաղի անկախ կարգավիճակի ճանաչումը նախապայման է եւ միակ երաշխիքը Արցախի եւ հայութեան համար:
«ՄԱՍԻՍ»