Ուաշինկթընի մէջ ռոպոթաշինութեան միջազգային ողիմպիական «FIRST Global» խաղերուն Հայաստանը ներկայացնող խումբը զբաղեցուցած է երրորդ տեղը՝ արժանանալով պրոնզէ մետալի: «Արմէնբրէս»ի հաղորդմամբ, ռոպոթաշինութեան միջազգային ողիմպիական խաղերուն կը մասնակցէին խումբեր աշխարհի 163 երկիրներէ: Հայաստանը կը ներկայացնէին ԹՈՒՄՕ ստեղծարար տեխնոլոկիաներու կեդրոնի սաները:
Այս տարի խաղերու մասնակիցներուն առաջադրանք տրուած էր նախագծել իրենց ռոպոթը, որ կը կարողանայ իրականացնել շարք մը երկրաչափական խնդիրներ՝ կապուած «մաքուր ջուրի հասանելիութիւն ունենալու» հետ, ինչպէս նաեւ կը կարողանայ համագործակցիլ ռոպոթներու միջազգային դաշինքներուն հետ:
Հայաստանի մասնակիցները զիջեցան միայն Եւրոպայի հաւաքական խումբին եւ Լեհաստանի խումբին։ Խումբի անդամներն են 14-18 տարեկան թումօցիներ Լեւոն Բալագէոզեան, Մարիա Տէր Մինասեան, Դաւիթ Յովհաննիսեան, Տիգրան Կիրակոսեան, Արամ Մադանցեան, Լիլիթ եւ Աշոտ Թառումեաններ եւ անոնց ղեկավար, Թումոյի ռոպոթաշինութեան դասընթացավար Հայկ Ոսկանեան։ Յաղթանակած խումբը Երեւան պիտի ժամանէ 21 Յուլիսին ժամը 13։45-ին:
