Home ԱՅԼԱԶԱՆ Ռուսաստանի Մաքսիմքա Լիճին Մէջ 7 Հայ Ջրահեղձ Եղած է, Որոնցմէ 4-ը՝ Երեխայ

Ռուսաստանի Մաքսիմքա Լիճին Մէջ 7 Հայ Ջրահեղձ Եղած է, Որոնցմէ 4-ը՝ Երեխայ

by MassisPost

Երկուշաբթի օրը Ռուսաստանի Չելիապինսկի մարզի Մաքսիմքա լիճին մէջ ջրահեղձ եղած է  7 մարդ, այդ շարքին՝ 4 երեխայ, բոլորը՝ հայ համայնքի ներկայացուցիչներ, կը գրէ РБК-ն: Նաւակը դարձած է, նաւակին մէջ գտնուող մարդիկ անոր տակ յայտնուած են:

Շուրջ երեք տասնեակ հայեր հաւաքուած էին լիճի ափին ուրախ առիթով՝ հաւաքուածներէն մէկու դուստրը աւարտած էր դպրոցը ոսկէ մետալով:

Կատարուածի մասին որոշ մանրամասներ յայտնած է Չեսմենսքի շրջանի վարչակազմի ղեկավարի մամլոյ քարտուղար Եուլիա Վոսկրեպենցովան: Ըստ այդմ՝ նաւակին մէջ մէկ կամ երկու տղամարդ կար, չորս կին եւ չորս երեխայ, կիները փրկուած են, երեխաները բոլորը մահացած են, ինչպէս նաեւ մահացած են նաւակի սեփականատէրն ու օգնութեան հասած երկու տղամարդիկ:

3 Յուլիսի երեկոյեան կը հաղորդուէր 6 զոհուածներու մասին, աւելի ուշ զոհուածներու թիւը հասած է  7-ի:

«Նաւակը պարզապէս ծանրաբեռնուած էր չափէն աւելի», – ըսած է Վոսկրեպենցովան եւ աւելցուցած, որ լիճին մէջ կ’արգիլուէր լողալ եւ մոթորանաւակով զբօսնել: Բացի այդ, նախնական տուեալներով, տղամարդը, որ նաւը կը վարէր, մինչ այդ ալքոլ  ընդունած էր:

Քննչական կոմիտէն կատարուածի կապակցութեամբ քրէական գործ յարուցած է Ռուսաստանի քրէական օրէնսգիրքի 109-րդ յօդուածի երրորդ մասով:

Զոհուած երեխաներն են՝ 10 տարեկան աղջիկ, երկու 8 եւ մէկ 15 տարեկան տղաներ, անոնցմէ ոչ մէկը փրկարար բաճկոն ունէր, կը փաստեն Քննչական կոմիտէի տարածաշրջանային վարչութենէն:

Զոհուածները տեղացի գործարարներ են, որոնք Ռուսաստան եկած էին քանի մը տարի առաջ, եւ անոնց երեխաները:

Չելիապինսկի մարզի նահանգապետ Պորիս Տուպրովսկին երէկ երեկոյեան յայտարարած է, որ զոհուածներու ընտանիքները կը ստանան 100 հազար ռուբլի օգնութիւն:

Հարակից Նյութեր

Leave a Comment