Ֆրանսայի նախագահ Էմանուէլ Մաքրոնի «Առաջ Հանրապետութիւն» կուսակցութիւնը բացարձակ մեծամասնութիւն ստացած է Ֆրանսայի խորհրդարանի ստորին պալատին մէջ՝ ընտրութիւններու երկրորդ փուլի արդիւնքով:
Նախագահ Մաքրոնի կուսակցութեան 5 հայազգի թեկնածուներէն պատգամաւոր դարձած են 4-ը: Հայ մասնակիցներէն Փասքալ Շամասեանը, հաւաքելով 45 տոկոս ձայներ, իր ընտրատարածքին մէջ զիջած է «Հանրապետականներ» կուսակցութեան թեկնածու Վալէրի Պուայէին, որ ստացած էր քուէներու 55 տոկոսը: Վալէրի Պուայէն յայտնի է Հայոց ցեղասպանութեան ժխտման քրէականացման օրինագիծի առաջ մղման ուղղուած գործունէութեամբ: Պատգամաւորներ դարձած են ֆրանսահայեր Դանիէլ Ղազարեանը, Ժաք-Մարի Լուսեանը, Նատիա Եսայեանը եւ Կիոմ Գասպարեանը:
Նախագահի կուսակցութիւնը այժմ 577 տեղանոց խորհրդարանին մէջ շուրջ 370 մանդատ ունի, այդ շարքին՝ դաշնակից «Դեմոկրատական շարժում» (MoDem) կուսակցութեան մանդատները: «Աջ պահպանողական հանրապետականներ» եւ «Անկախներու դեմոկրատական միութիւն» կուսակցութիւնները յաղթած են 133 տեղամասերով:
Նախկին իշխող ուժը՝ Սոցիալիստական կուսակցութիւնը ջախջախիչ պարտութիւն կրած է, ստանալով ընդամէնը 32 մանդատ»: Ազգայնական Մարին Լը Փենի «Ազգային ճակատ» կուսակցութիւնը նուաճած է 6 մանդատ, եւս 6 մանդատ ստացած է «Ազգային ճակատ»-ի դաշնակից «Ոտքի Ֆրանսա» շարժումը: Մնացեալ ձախակողմեան ուժերը, այդ շարքին՝ կոմունիստները, միասին խորհրդարանի մէջ ստացած են 26 տեղ: Կ’ենթադրուի, որ այդ ուժերը պիտի միաւորուին խորհրդարանական մէկ խումբի մէջ: