Ղարաբաղեան խնդիրի կարգաւորման բանակցութիւններուն մէջ համաձայնեցուած են ընդհանուր սկզբունքները, սակայն համաձայնեցուած չեն մանր, բայց շատ կարեւոր եւ զգայուն մանրամասները: Երեքշաբթի օր Քալինինկրատի համալսարանի ուսանողներու հետ հանդիպման ժամանակ այս մասին յայտարարած է ԵԱՀԿ Մինսքի խումբի համանախագահ Ռուսաստանի արտաքին գործոց նախարար Սերկէյ Լաւրովը:
Բացի այդ, ան որոշ մանրամասներ յայտնած է բանակցային գործընթացի մասին․ – «Ղարաբաղեան խնդիրի կարգաւորման շուրջ պայմանաւորուածութիւնները՝ տարբեր ձեւաչափերով, բազմիցս շատ մօտ էին հանգուցալուծման, բայց անվստահութեան բնազդ կ’առաջանար մէկ այս կողմի, մէկ՝ միւս կողմի մօտ․․․ Սակայն պէտք է շարունակել աշխատանքները»:
Ռուսաստանի արտաքին գործոց նախարարը եւս մէկ անգամ ընդգծած է, որ կողմերը չեն կրնար համաձայնեցնել հանգուցալուծման հասնելու ճանապարհը: «Կայ սկզբունքներու փաթեթ մը, որոնք ընդհանուր առմամբ բոլորի կողմէն համաձայնեցուած են, սակայն սատանան մանրամասներու մէջ է՝ ինչպէս շարժիլ առաջ դէպի այդ հանգուցալուծումը, ինչ ճանապարհով: Անոնք արտաքուստ մանր մանրամասներ են, սակայն շատ բարդ, զգայուն, նաեւ՝ ներքաղաքական զարգացումներու առումով զգայուն են», – ըսած է Լաւրով:
Ան նաեւ ակնարկած է, որ կրնան փոխուիլ ամերիկացի եւ ֆրանսացի համանախագահները․ – «ԱՄՆ եւ Ֆրանսայի նոր նախագահները պէտք է նշանակեն նոր համանախագահներ, եւ պէտք է միասին մտածենք, թէ ինչպէս յաղթահարել դեռ չհամաձայնեցուած՝ արտաքուստ մանր, սակայն շատ կարեւոր հարցերը»:
Աւելցնենք՝ մարտին ատրպէյճանական APA լրատուական գործակալութեան տուած հարցազրոյցին նոյնպէս Ռուսաստանի արտաքին գործոց նախարարը ընդգծած էր, թէ համաձայնեցուած են ընդհանուր սկզբունքները, սակայն կը մնան որոշ մանրամասներ, որոնք բարդ են: «Կողմերը հիմնական չհերքելով հենքը՝ տարբեր կերպ կը պատկերացնեն կարգաւորման բաղադրիչները կեանքի կոչելու հերթականութիւնը», – ըսած էր Սերկէյ Լաւրով:
