Համաշխարհային Պանքի (ՀՊ) հրապարակած Trade in Transition զեկոյցի համաձայն, յառաջիկայ տարիներուն Հայաստանը զգալիօրէն պիտի աւելցնէ իր պետական պարտքը: Եթէ 2014 թուականին Հայաստանի պետական պարտքը կը կազմէր երկրի տնտեսութեան 43.7 տոկոսը, ապա 2019-ին, աճելով մօտ 15 տոկոսային կէտով, այն կը կազմէ 58.2 տոկոս:
2008-2016 թուականներու ընթացքին Հայաստանի պետական պարտքը աճած է աւելի քան 3 անգամ՝ հասնելով 6 միլիառ տոլարի:
Համաշխարհային պանքի նոյն զեկոյցին մէջ Հայաստանի վերաբերեալ կայ ոչ-մխիթարական եւս մէկ լուր. անցած տարի աղքատութեան մակարդակը աճած է, հակառակ գրանցուած տնտեսական աճին:
Եթէ 2015 թուականին բնակչութեան 22.6 տոկոսը աղքատ էր, ապա անցած տարի՝ 23.9 տոկոսը:
Պանքի փորձագէտներու գնահատմամբ, Հայաստանի բնակչութեան 23.9 տոկոսը օրական 2.5 տոլարէն քիչ կը ծախսէ: Իսկ եթէ շեմը կը դիտարկենք օրական 5 տոլարը, ապա, ըստ զեկոյցի, անցած տարի աղքատ էր Հայաստանի բնակչութեան 73.4 տոկոսը: Այսինքն՝ 2016 թուականին Հայաստանի բնակչութեան գրեթէ 3/4-րդը օրական ծախսած է 2 հազար 500 դրամէն քիչ գումար: