Այս տարուայ առաջին երեք ամիսներուն Հայաստանի մէջ արձանագրուած ժողովրդագրական հիմնական ցուցանիշները ուղղակի սահմռկեցուցիչ են: Անոնք ուղղակիօրէն կը շօշափեն մեր երկրի հեռանկարի եւ անվտանգութեան հարցերը:
ՀՀ ազգային վիճակագրական ծառայութեան հրապարակած այս տարուայ առաջին եռամսեակի հիմնական ընկերային- տնտեսական ցուցանիշների` ժողովրդագրութեան վերաբերող պաշտօնական տուեալներով, Հայաստանի մէջ ծնունդներու թիւը անցած տարուայ նոյն ժամանակահատուածի համեմատ կտրուկ նուազած է (գծ.1): Եթէ անցած տարուայ առաջին եռամսեակի ընթացքին Հայաստանի մէջ ծնած էր 9 հազար 125 երեխայ, ապա այս տարի՝ ընդամէնը 8 հազար 534: 2011 թուականի առաջին երեք ամիսներուն ծնածներու թիւը կ’անցնէր 10 հազարը: Փաստօրէն ծնունդներու թիւը այս 7 տարիներու ընթացքին նուազած է մօտ 16 տոկոսով:
Նոյնքան կտրուկ աճած է մահերու թիւը (գծ. 2): Անցած տարի առաջին եռամսեակի ընթացքին Հայաստանի մէջ արձանագրուած է 8 հազար 37 մահ: Վերջին 7 տարիներուն աւելի շատ մահեր արձանագրուած են 2014 թուականին:
Զուտ ժողովրդագրական տեսանկիւնէ ամենակարեւոր ցուցանիշը թերեւս բնական յաւելաճն է` ծնածներու եւ մահացածներու թիւրերու տարբերութիւնը (գծ. 3): Ահա այս ցուցանիշն է, որ ամենասարսափելին է: Ծնածներու եւ մահացածներու թիւերու տարբերութիւնը այս տարուան առաջին եռամսեակին մէջ եղած է 497: Այս մօտ երեք անգամ քիչ է անցած տարուայ ցուցանիշէն: Դժուար է գտնել բնական յաւելաճի ընթացքի՝ մէկ տարուայ ընթացքին արձանագրուած նման կտրուկ անկում անցած 20-25 տարիներուն: Իսկ ամենասարսափելին այն է, որ, ինչպէս պարզ կ’երեւի գծապատկեր 3-ին մէջ, բնական յաւելաճի ընթացքի անկումը կ’արձանագրուի արդէն 5-րդ տարին անընդմէջ:
Այսպիսի կայուն միտումը ցոյց կու տայ, որ գործ ունինք ոչ թէ կարճաժամկէտ երեւոյթի հետ, որ ինչ-որ գործօններու ազդեցութեան տակ կրնայ յաջորդ տարի փոխուիլ, այլ արմատական բնոյթի գործընթացի: Ըսուածի ապացոյցն է մէկ այլ ցուցանիշ` ամուսնութիւններու թիւի փոփոխութիւնը (գծ. 4): Այս տարուայ առաջին եռամսեակին ընթացքին արձանագրուած է 3 հազար 544 ամուսնութիւն այն պարագային, երբ, օրինակ, 4 տարի առաջ այդ թիւը 4 հազար 744 էր:
Այս աղէտալի միտումները հնարաւորինս արագ կանխելու միակ տարբերակը զանգուածային ներգաղթն է, որն ալ կրնայ պայմանաւորուած ըլլալ միայն տնտեսութեան մէջ արագ եւ արմատական բարեփոխումներով: Սակայն քաղաքական գործընթացները ցոյց կու տան, որ նման փոփոխութիւններու հեռանկարները գոնէ առայժմ կը բացակային: