Պոլսոյ Հայոց պատրիարքական տեղապահ ընտրուած Գարեգին արքեպիսկոպոս Պէքճեան հերքած է հայկական շարք մը լրատուամիջոցներու տարածած տեղեկութիւնը այն մասին, թէ կը պատրաստուի հրաժարական տալ: Այս մասին յայտնած է Պոլսոյ հայկական «Ժամանակ» օրաթերթը: Անդրադառնալով լրատուամիջոցներէն մէկուն տուած մեկնաբանութեան` Պէքճեան պարզաբանած է. «Խօսքի մէջ ըսի` եթէ պէտք ըլլայ, կրնամ հրաժարիլ, սակայն նման բան չկայ»:
Սրբազան Հայրը անդրադարձած է Թուրքիոյ նախագահ Էրտողանի` 24 Ապրիլին ըրած ուղերձին ու անոր մէջ պատրիարքական ընտրութեան մասին ակնարկին` նշելով.
«Լաւ է, որ նման պատգամ հրապարակած է: Անցեալ տարի ալ հրապարակած էր, այս տարի ալ: Ինչ կը վերաբերի պատրիարքական ընտրութեան հարցին, անոր անդրադարձին` այդ մէկը լաւ է, տեսնենք արդիւնքը ինչ կ’ըլլայ»:
Տեղապահը յայտնած է, որ յառաջիկայ օրերուն պիտի ժամանէ Մայր Աթոռ Սուրբ Էջմիածին, այնուհետեւ պիտի մեկնի Մոսկուա` մասնակցելու Գերագոյն հոգեւոր խորհուրդի (ԳՀԽ) ժողովներուն: Հաւանական է, որ Էջմիածինի մէջ Պէքճեան Ամենայն Հայոց Գարեգին Բ կաթողիկոսի հետ քննարկէ պատրիարքական աթոռի շուրջ ստեղծուած հարցը:
Պէքճեանը Գերագոյն հոգեւոր խորհուրդի անդամ է որպէս Գերմանիոյ Հայոց թեմի առաջնորդ, սակայն Մոսկուայի մէջ կայանալիք նիստին պիտի մասնակցի որպէս Պոլսոյ պատրիարքական աթոռի ընտրեալ տեղապահ:
«Ժամանակ»-ի տեղեկութիւններով` պատրիարքական փոխանորդ Արամ արքեպիսկոպոս Աթէշեան յառաջիկային ծրագրած այցեր չունի Մայր Աթոռ կամ Մոսկուա` մասնակցելու Գերագոյն հոգեւոր խորհուրդի նիստերուն, ուստի ԳՀԽ ժողովին Պոլսոյ պատրիարքարանի միակ ներկայացուցիչը Պէքճեանը պիտի ըլլայ:
«Ամէն բան կախուած է Թուրքիոյ կառավարութեան որոշումէն»
«Հայ Ձայն» կայքի հետ զրոյցին Պէքճեանը նշած է, որ իրավիճակը կը շարունակէ անկայուն մնալ, եւ ամէն բան կախուած է Թուրքիոյ կառավարութեան որոշումէն: Ան յայտարարած է, որ եթէ Պոլսոյ Հայոց պատրիարքի ընտրութիւններուն շուրջ ստեղծուած ճգնաժամին մէջ մօտ ապագային դրական տեղաշարժ չնկատուի` ան կրնայ հրաժարական տալ։
«Նախքան տեղապահ ընտրուիլս՝ ես չէի ենթադրեր, որ նման իրավիճակի մէջ կրնամ յայտնուիլ, եւ եթէ կառավարական մարմիններու հետ բանակցութիւնները դրական արդիւնքներ չտան` ես կրնամ հրաժարական տալ», – ըսած է Պէքճեան:
Յիշեցնենք, որ Փետրուարին Էջմիածինի մէջ կայացած որոշման համաձայն՝ 15 Մարտին Պոլսոյ մէջ տեղի ունեցած է Պոլսոյ Հայոց պատրիարքի տեղապահի ընտրութիւն: Ընտրութենէն ետք, որուն համոզիչ յաղթանակ տարած էր Պէքճեան, Պոլսոյ նահանգապետարանը անակնկալ կերպով միջամտած էր ընտրութիւններուն: Պոլսոյ նահանգապետի տեղակալը նախքան պատրիարքարանին մէջ ընտրութիւնները սկսիլը, գրութիւն ուղարկած է, ուր իրաւաբանօրէն անհնար կը համարէ պատրիարքական ընտրութիւններու գործընթացի մեկնարկը: Այս գրութիւնը Պոլսոյ Հայոց պատրիարքի տեղապահի ընտրութիւններէն անմիջապէս ետք պատրիարքարանի հոգեւորականներուն ներկայացուցած է տեղապահի ընտրութիւններուն պարտուած փոխանորդ Արամ արքեպիսկոպոս Աթէշեանը եւ յայտարարած, որ չի հեռանայ տեղապահի պաշտօնէն: