Ատրպէյճանի Մէջ Լայնածաւալ Զօրավարժութիւններ Կ’ընթանան

Ատրպէյճանի պաշտպանութեան նախարարութիւնը հաղորդած է, որ զօրավարժութիւններուն կը մասնակցին 30 հազար զինծառայող, 250 թանկ եւ զրահամեքենայ, հրթիռա-հրետանային 200 համակարգ, մարտական 25 ինքնաթիռներ, անօդաչու թռչող սարքեր: Կիրակի օրը մեկնարկած զօրավարժութիւնները պիտի շարունակուին հինգ օր եւ աւարտին 21 ապրիլին:

Զօրավարժութիւնները կ’իրականացուին բարդ   պայմաններու մէջ մարտ մղելու սցենարով: Հրթիռային եւ հրետանային համակարգերը դուրս  բերուած են կրակային դիրքեր, ստեղծուած են գրոհային խումբեր, վերատեղակայուած են ստորաբաժանումներն ու հրմանատարային կէտերը:

Երկրի պաշտպանութեան նախարարութեան հաղորդագրութեան մէջ նշուած է, որ լայնածաւալ զօրավարժութիւններու նպատակն է՝ ստուգել զօրքերու մարտական պատրաստուածութիւնը, կազմակերպել զինուած ուժերու կառավարումն ու փոխգործակցութիւնը՝ գործողութիւնները մօտեցնելով մարտական իրավիճակի պայմաններուն:

Ռուսական «Russia Today» հեռուստաընկերութիւնը օրերս հաղորդում հեռարձակած է ատրպէյճանական բանակի մասին, նշելով որ Ատրպէյճանի բանակը տարածաշրջանին մէջ «ամենահարուստն է»: 90-ականներու համեմատ, Ատրպէյճանի ռազմական պիւտճէն 20 անգամ մեծցած է: 2003 թուականին Ատրպէյճանի ռազմական պիւտճէն 160 միլիոն տոլար էր, իսկ տաս տարի անց, 2013 թուականին, արդէն 3 միլիառ 700 միլիոն տոլար:

Աշխարհի երկիրներու զինուած ուժերու ուսումնասիրութեամբ զբաղուող «Global Firepower» կայքի 2016 թուականի զեկոյցին մէջ աշխարհի 126 երկիրներու շարքին Ատրպէյճանը 60-րդ տեղը կը գրաւէ, 34 կէտով ետ թողելով Հայաստանը: Հայաստանը իր բանակի հզօրութեան ցուցանիշով այդ զեկոյցին մէջ զբաղեցուցած է 94-րդ հորիզոնականը