Գերմանիոյ Արտաքին գործոց նախարար Զիկմար Գաբրիէլը յայտարարած է, որ Գերմանիան եւ Թուրքիան պէտք է քայլեր ձեռնարկեն շարք մը սադրանքներու հետեւանքով խաթարուած դիւանագիտական յարաբերութիւնները վերականգնելու ուղղութեամբ, միեւնոյն ժամանակ զգուշացնելով Անգարային, որ նացիստներու հետ համեմատութիւնը «այն կարմիր գիծն է, որ կարելի չէ անցնիլ»:
8 Մարտին Թուրքիոյ Արտաքին գործոց նախարար Մեւլութ Չաւուշօղլուի հետ հանդիպումէն ետք Գաբրիէլը յայտարարած է, որ հակառակ կողմերու ունեցած տարաձայնութիւններուն՝ «երկխօսութեան այլընտրանք չկայ, որովհետեւ ան միակ ճանապարհն է բնականոն եւ բարեկամական յարաբերութիւնները վերականգնելու համար»:
Երկու երկիրներու յարաբերութիւնները սրուած էին Թուրքիոյ եւ Գերմանիոյ քաղաքացի՝ «Die Welt» պարբերականի թղթակից Տէնիզ Եուճէլի ձերբակալութենէն ետք: Այնուհետեւ, երբ Գերմանիոյ տարբեր քաղաքներու մէջ արգիլուեցան թուրք պաշտօնեաներու ելոյթները՝ Գերմանիոյ մէջ բնակող Թուրքիոյ քաղաքացիներու շրջանին սահմանադրական հանրաքուէի վերաբերեալ քարոզարշաւ իրականացնելու նպատակով, Թուրքիոյ նախագահ Էրտողան Գերմանիոյ մեղադրեց «նացիստական գործելակերպի» մէջ: Անոր այս յայտարարութեան անմիջապէս արձագանգեց Գերմանիոյ վարչապետ Անկելա Մէրքէլի գրասենեակը, յայտարարելով, որ Էրտողանի այդ գնահատականը «անհեթեթ է եւ տեղին չէ»:
