«Ամէն տարի մենք կը նշենք Հրանդ Տինքի սպանութեան տարելիցը, կը մեծարենք անոր քաջութիւնը փոքրամասնութիւններու իրաւունքներու համար պայքարին, եւ յարգանքի տուրք կը մատուցենք խաղաղութիւն հաստատելուն ուղղուած անոր բացառիկ ջանքերը»,- ըսած է ԵԱՀԿ մամլոյ ազատութեան հարցերով ներկայացուցիչ՝ Տունիա Միյաթովիչ: «Եւ ամէն անգամ մենք ստիպուած ենք յիշել, որ նոյնիսկ մէկ տասնամեակ անց այս ողբերգութեան պատուիրատուները անպատիժ կը մնան»:
19 Յունուար, 2007-ին Պոլիս հրապարակուող երկլեզու՝ հայերէն եւ թրքերէն «Ակօս» շաբաթաթերթի խմբագիր Տինք սպաննուեցաւ իր խմբագրութեան մուտքին մօտ: Թէեւ մարդասպանը՝ Օգիւն Սամասթ, յայտնաբերուած եւ դատապարտուած է 22 տարուան ազատազրկման, յանցագործութիւնը ամբողջութեամբ չէ բացայայտուած: Տունիա Միյաթովիչ այս առնչութեամբ ըսած է․«Ես կոչ կ’ընեմ Թուրքիոյ իշխանութիւններուն աշխուժացնել ջանքերը, որպէսզի արդարադատութիւնը իրականանայ եւ որպէսզի Հրանդ Տինքի հարազատներուն եւ ընկերներուն մէկ տասնամեակ շարունակ անպատասխան մնացած հարցերը պատասխաններ ստանան: Իշխանութիւնները պէտք է նաեւ վերահաստատեն իրենց հասարակութեան ուղղուած այն կարեւորագոյն ուղերձը, որ լրագրողներու դէմ բռնութիւնը անպատիժ չի մնայ»:
