Գողութիւնը, բանակի հաշուին ապօրինի հարստանալը պէտք է դառնայ անհնար: Այս մասին Հանրային հեռուստաընկերութեան «Օրակարգից դուրս» հաղորդման ժամանակ ըսած է ՀՀ պաշտպանութեան նախարար Վիգէն Սարգսեան` նշելով, որ անոր համար անհրաժեշտ է ներդնել համապատասխան ընթացակարգեր:
«Հանրապետութեան նախագահի վերահսկողական ծառայութեան կողմից բացայայտուած չարաշահումներից յետոյ հետեւութիւններ են արուել, բանակին մատակարարումներ անող ընկերութիւնների հետ աշխատանքը դարձել է աւելի բաց ու թափանցիկ: Մենք շահագրգիռ ենք, որ բոլոր ապրանքատեսակները հնարաւորինս ցածր գնով ստանանք, բայց բարձր որակով: Մենք շարունակելու ենք այդ քայլերը: Կարծում եմ՝ այն գործարարները, որոնք բանակի հետ աշխատում են, արդէն զգացել են այդ քաղաքականութեան ազդեցութիւնը: Այս ամիսների ընթացքում կտրուկ նուազել է բանակին թերի մատակարարումների ծաւալը, որը, ցաւօք սրտի, բաւականին մեծ էր: Գնային առումով զգալիօրէն բարձրացել է նոր կնքուած պայմանագրերի արդիւնաւէտութիւնը»,- նշած է նախարարը:
Վիգէն Սարգսեանի խօսքով` ասոր զուգահեռ կը շարունակուին խախտումներ կատարած գործարարներուն ու «չինովնիկներ»ուն պատասխանատուութեան ենթարկելու գործողութիւնները: